गुजरात राज्यातील आणंद आणि वडोदरा शहरांना जोडणारा ४३ वर्षे जुना गंभीरा नदीवरील पूल बुधवारी सकाळी ८:३० च्या सुमारास अचानक कोसळला. या भीषण दुर्घटनेत तीन जणांचा मृत्यू झाल्याची दुर्दैवी माहिती समोर आली असून, दोन ट्रक, एक पिकअप व्हॅन व आणखी एक वाहन थेट नदीत कोसळल्याची प्राथमिक माहिती आहे.
सध्या पूल कोसळल्याचा हृदयद्रावक व्हिडिओ सोशल मीडियावर प्रचंड व्हायरल होत आहे. व्हिडिओमध्ये अर्धवट तुटलेल्या पुलावर एक ट्रक लटकताना स्पष्टपणे दिसत आहे. त्या क्षणाची भयावहता पाहून देशभरातून प्रतिक्रिया उमटत आहेत.
मुसळधार पावसामुळे ढासळली रचना: गुजरातमध्ये गेल्या काही दिवसांपासून सुरू असलेल्या मुसळधार पावसामुळे भू-आधार शिथिल झाल्याचे प्राथमिक तपासात स्पष्ट झाले आहे. पूल खूप जुना असून, त्याच्या दुरुस्तीची मागणी अनेक वेळा स्थानिकांकडून करण्यात आली होती. मात्र, याकडे दुर्लक्ष झाल्याचा आरोप आता जोर धरू लागला आहे.
बचावकार्य युद्धपातळीवर सुरू: घटनेनंतर प्रशासनाने तात्काळ NDRF, SDRF आणि पोलीस दलाच्या मदतीने बचावकार्य सुरू केले आहे. स्थानिक नागरिकही धावून आले असून मदतीसाठी रात्रंदिवस प्रयत्न सुरू आहेत. वाहतुकीसाठी पर्यायी मार्गांचीही व्यवस्था केली जात आहे.
सार्वजनिक बांधकाम विभागाच्या कार्यक्षमतेवर प्रश्नचिन्ह: या दुर्घटनेनंतर सरकारच्या सार्वजनिक बांधकाम विभागावर टीकेची झोड उठली आहे. ४० वर्षांपेक्षा जुने पूल आजही वापरात का आहेत? या प्रश्नावर आता सरकारला उत्तर द्यावे लागणार आहे. अशा दुर्घटनांची पुनरावृत्ती होऊ नये यासाठी तातडीने सर्व जुन्या पूलांचे परीक्षण करून त्यावर उपाययोजना करण्याची गरज व्यक्त होत आहे.
स्थानिकांचा संताप: घटनास्थळी जमा झालेल्या लोकांनी प्रशासनाच्या हलगर्जीपणावर संताप व्यक्त केला आहे. “एव्हढा जुना पूल असूनही त्याचे कोणतेही नूतनीकरण झाले नाही, हे प्रशासनाचे अपयश आहे,” अशा संतप्त प्रतिक्रिया नागरिकांकडून व्यक्त केल्या जात आहेत.
मृतांना श्रद्धांजली आणि जखमींसाठी प्रार्थना: ही दुर्घटना केवळ आणंद आणि वडोदऱ्यापुरती मर्यादित राहिलेली नाही, तर देशभरातील पूल सुरक्षेबाबत चिंता व्यक्त करणारी ठरली आहे. मृतांच्या कुटुंबीयांप्रती सर्व स्तरांतून श्रद्धांजली अर्पण केली जात आहे, तर जखमींसाठी त्वरित वैद्यकीय मदतीची व्यवस्था करण्यात आली आहे.
