पिंपरी-चिंचवड: पिंपरी-चिंचवडमध्ये आईच्या प्रियकराकडून १४ वर्षीय मुलीवर लैंगिक अत्याचार झाल्याचा धक्कादायक प्रकार उघडकीस आला आहे. पीडित मुलीने शाळेतील शिक्षिकेला ही घटना सांगितल्यानंतर शाळेने तातडीने पोलिसांना कळवले.
रावेत, ३० ऑगस्ट २०२४: रावेत पोलीस ठाण्याच्या हद्दीत १४ वर्षीय मुलीवर तिच्या आईच्या प्रियकराने कथितपणे अत्याचार केल्याचा आरोप आहे. तक्रार मिळताच पिंपरी-चिंचवड पोलिसांनी त्वरित गुन्हा दाखल करून आरोपीला हडपसर येथून अटक केली आहे. अटक केलेल्या आरोपीचे नाव पंकज बाबूराव धोत्रे (वय ४५, रा. हांडेवाडी, हडपसर) असे आहे.
वरिष्ठ पोलीस निरीक्षक नितीन फटांगरे यांनी दिलेल्या माहितीनुसार, पीडित मुलीचे आई-वडील गेल्या सहा वर्षांपासून विभक्त राहत आहेत. पीडित मुलगी आणि तिचा भाऊ आईसोबत रावेतमधील एका सोसायटीत राहतात. आरोपी पंकज धोत्रे एका कंपनीत व्यवस्थापक म्हणून काम करतो. तो विवाहित असून त्याला मुले आहेत. पीडित मुलीची आई आणि आरोपी यांच्यात २०१९ पासून प्रेमसंबंध आहेत आणि तो तिच्या घरी नियमित येत असे.
सुमारे वर्षभरापूर्वी, आरोपीने मुली अनुपस्थितीत तिच्यासोबत अनुचित वर्तन करण्याचा प्रयत्न केला. मुलीने हे आईला सांगितले होते, पण या प्रकरणाकडे दुर्लक्ष झाले. ८ ऑगस्ट रोजी, मुलगी घरी एकटी असताना आरोपीने पुन्हा तिला छळले. मुलीने ओरडल्यावर आरोपीने तिला सोडले. २८ ऑगस्ट रोजी, मुलीने तिच्या वर्गशिक्षिकेला ही घटना सांगितली. परिस्थितीचे गांभीर्य लक्षात घेऊन शिक्षिकेने तात्काळ मुख्याध्यापकांना याची माहिती दिली. मुख्याध्यापकांनी त्वरित दामिनी पथकाच्या महिला अधिकाऱ्यांना बोलावून संपूर्ण घटना कळवली. पोलिसांनी तातडीने गुन्हा दाखल करून आरोपीला अटक केली.
