बिबवेवाडी पोलिसांची तत्परता – हरवलेल्या ८ वर्षीय चिमुकलीचा अवघ्या २ तासांत शोध!
६ एप्रिल २०२५ रोजी सकाळी ७:५० वाजता एक महिला घाबरलेल्या अवस्थेत बिबवेवाडी पोलीस ठाण्यात आली. तिची ८ वर्षीय मुलगी सकाळी ६:४५ वाजता बाहेर खेळत असताना अचानक बेपत्ता झाली होती. कुटुंबीयांनी तब्बल एक तास शोध घेतला पण मुलगी कुठेही सापडली नाही, त्यामुळे ते हवालदिल झाले होते. घटनेचे गांभीर्य ओळखून पोलिसांनी तातडीने शोधमोहीम सुरू केली. वरिष्ठ पोलीस निरीक्षक श्री. शंकर साळुंखे यांनी त्वरित पोलिसांचे पथक रवाना करण्याचे निर्देश दिले. पोलीस उपनिरीक्षक अशोक येवले, बिट मार्शल, तपास पथक आणि सीआर मोबाईलवरील पोलीस विविध दिशांना पाठवण्यात आले. घटनास्थळाजवळील सीसीटीव्ही फुटेज तपासले असता, मुलगी यशराज गार्डन परिसरात जात असल्याचे आढळले. त्या परिसरात शोध घेतल्यावर निर्जनस्थळी एकटीच रडत असलेली मुलगी आढळून आली. या वेगवान तपासामुळे एखाद्या मोठ्या संकटाची वेळ टळली. कुटुंबीय आणि नागरिकांनी बिबवेवाडी पोलिसांचे मनःपूर्वक आभार मानले.