पुणे – सध्या वैद्यकीय क्षेत्रात एकामागोमाग एक डॉक्टर आत्महत्या करत असल्याच्या घटनांनी चिंता वाढवली असताना, पुण्यात आणखी एका युवक डॉक्टरने आयुष्य संपवले आहे. रुबी हॉल क्लिनिकमधील रेडिओलॉजी विभागात निवासी डॉक्टर म्हणून कार्यरत असलेल्या डॉ. श्याम व्होरा (वय 28) यांनी गळफास घेऊन आत्महत्या केल्याची धक्कादायक घटना उघडकीस आली आहे.
मोबाईलचा पासवर्ड ठेवलाय, पण प्रश्न अनुत्तरित
या घटनेतील सर्वात रहस्यमय बाब म्हणजे, डॉ. व्होरांनी आत्महत्या करण्यापूर्वी कागदावर आपला मोबाईलचा पासवर्ड लिहून ठेवलेला आढळून आला आहे. त्यामुळे त्यांच्या मोबाईलमध्ये आत्महत्येचं खरे कारण दडलेलं असू शकतं, अशी शक्यता पोलिसांकडून वर्तवली जात आहे. हे प्रकरण अधिक खोलात जाऊन तपासण्याची गरज निर्माण झाली आहे.
घटनास्थळ आणि परिस्थिती
ही घटना रविवारी (दि. ८ जून) रात्री १० वाजण्याच्या सुमारास घडली. डॉ. व्होरा राहत असलेल्या ढोले पाटील रोडवरील दामोदर भवन इमारतीतील हॉस्टेलच्या खोलीत त्यांनी आत्महत्या केली. रुबी हॉल क्लिनिकपासून अवघ्या ३०० मीटर अंतरावर ही इमारत असून, घटनेची माहिती मिळताच पुणे पोलिसांनी तातडीने घटनास्थळी धाव घेतली.
वैद्यकीय क्षेत्रातील मानसिक तणावाची गंभीर छाया
केवळ काही आठवड्यांपूर्वीच सोलापुरात प्रसिद्ध न्युरोफिजिशियन डॉ. शिरीष वळसंगकर यांनी स्वत:वर गोळी झाडून आत्महत्या केली होती. त्यानंतर तिथेच शिकाऊ डॉक्टरने वसतिगृहात गळफास घेतला होता. आणि आता पुण्यात डॉ. व्होरांची आत्महत्या या तीन मोठ्या घटनांमुळे वैद्यकीय क्षेत्रातील मानसिक आरोग्याच्या प्रश्नाकडे दुर्लक्ष केलं जाऊ शकत नाही.
तज्ञांच्या मते, डॉक्टरांवर रुग्णांची जबाबदारी, शिफ्टमधील ताण, परीक्षेचा दबाव, सामाजिक अपेक्षा आणि वैयक्तिक जीवनातील समस्यांमुळे मानसिक तणाव वाढतो. यावर वेळेत लक्ष दिलं नाही, तर अशा दुर्दैवी घटना पुन्हा घडू शकतात.
पोलीस तपास सुरू
पोलिसांनी मृतदेह ताब्यात घेत पोलिस पंचनामा आणि शवविच्छेदनासाठी ससून रुग्णालयात पाठवला आहे. मोबाईलचा पासवर्ड उपलब्ध झाल्याने मोबाईलमधील संदेश, नोट्स, कॉल रेकॉर्ड्स व ईमेल तपासले जाणार आहेत. आत्महत्येचं कारण वैयक्तिक आहे की, कामाशी संबंधित, हे शोधण्यासाठी तपास यंत्रणा सक्रिय झाली आहे.
डॉ. श्याम व्होरांच्या आत्महत्येने वैद्यकीय क्षेत्र हादरले; मन:स्वास्थ्यावर चर्चा होण्याची गरज – ताण, अपेक्षा आणि एकाकीपणाच्या सावटाखाली दबलेला एक तरुण डॉक्टर
