पुण्यात अवैध शस्त्रतस्करीवर मोठा आघात; गुन्हे शाखेची धडक कारवाई, ३ गावठी पिस्तुल व १३ जिवंत काडतूस जप्त

पुणे : शहरात वाढणाऱ्या अवैध अग्नीशस्त्र तस्करीवर आळा घालण्यासाठी पुणे पोलिसांच्या गुन्हे शाखेने मोठी आणि निर्णायक कारवाई केली आहे. “पुण्यश्लोक” गुन्हे शाखा युनिट-०५ च्या पथकाने गावठी बनावटीची पिस्तुले विक्रीसाठी आणणाऱ्या व ती खरेदी करणाऱ्या आरोपींना रंगेहाथ पकडत ३ गावठी पिस्तुल आणि १३ जिवंत काडतूस हस्तगत केली आहेत.

पुणे शहरात होणाऱ्या अवैध शस्त्रतस्करीबाबत माहिती गोळा करून संबंधित आरोपींवर कठोर कायदेशीर कारवाई करण्याच्या सूचना वरिष्ठ स्तरावरून वेळोवेळी देण्यात येत होत्या. त्यानुसार पोलीस निरीक्षक छगन कापसे यांच्या मार्गदर्शनाखाली गुन्हे शाखा युनिट-०५ चे पथक गोपनीय माहिती संकलन करत होते.

दि. १६ जानेवारी २०२६ रोजी पोलीस अभिलेखावरील आरोपी गौस ऊर्फ निहाल गब्बर मोमीन (वय ३६, रा. मिरज, जि. सांगली) हा हडपसर परिसरात गावठी बनावटीचे पिस्तुल विकण्यासाठी येणार असल्याची माहिती पोलीस अंमलदार शशिकांत नाळे व गणेश माने यांना मिळाली. वरिष्ठांच्या सूचनेनुसार सापळा रचून काळेबोराटे नगर, हडपसर येथे कारवाई करण्यात आली.

या कारवाईत पिस्तुल विकणारा आरोपी गौस ऊर्फ निहाल गब्बर मोमीन तसेच ती खरेदी करणारे आरोपी

1. अजय अरुण गायकवाड (वय २७, रा. म्हाळुंगे इंगळे, ता. खेड, जि. पुणे)

2. सुनील नागेंद्र जमादार (वय १९, रा. म्हाळुंगे इंगळे, ता. खेड, जि. पुणे)
   यांना ताब्यात घेण्यात आले.

आरोपी गौस ऊर्फ निहाल गब्बर मोमीन याच्याकडून १ गावठी पिस्तुल व ५ जिवंत काडतूस, तर आरोपी अजय अरुण गायकवाड याच्याकडून २ गावठी पिस्तुले व ८ जिवंत काडतूस असा एकूण ३ गावठी पिस्तुले आणि १३ जिवंत काडतूस जप्त करण्यात आली. विशेष बाब म्हणजे, गौस ऊर्फ निहाल गब्बर मोमीन आणि अजय अरुण गायकवाड हे दोघेही पोलीस अभिलेखावरील आरोपी असून, त्यांच्यावर विविध पोलीस ठाण्यांत मारहाण, तोडफोड आणि खुनासारखे गंभीर गुन्हे दाखल आहेत.

ही महत्त्वपूर्ण कामगिरी मा. अपर पोलीस आयुक्त (गुन्हे) श्री. पंकज देशमुख, मा. पोलीस उप आयुक्त (गुन्हे) श्री. निखिल पिंगळे, मा. सहायक पोलीस आयुक्त (गुन्हे-२) श्री. राजेंद्र मुळीक यांच्या मार्गदर्शनाखाली करण्यात आली. या कारवाईत पोलीस निरीक्षक छगन कापसे, पोलीस उपनिरीक्षक अभिजीत पवार तसेच शशिकांत नाळे, गणेश माने, प्रताप गायकवाड, विनोद शिवले, प्रमोद टिळेकर, अकबर शेख, राहुल ढमढेरे, अमित कांबळे, पल्लवी मोरे, स्वाती तुपे, तानाजी देशमुख, शहाजी काळे, प्रशांत कर्णवर, अविनाश इंगळे, नानासाहेब मोरे, अमर चव्हाण, नेत्रिका अडसुळ, नासिर देशमुख व परमेश्वर कदम यांच्या पथकाने प्रशंसनीय कामगिरी बजावली.

या कारवाईमुळे शहरातील अवैध शस्त्रसाठ्यावर मोठा आघात बसला असून, गुन्हेगारीला आळा घालण्यासाठी पुणे पोलिसांची भूमिका अधिक कठोर होत असल्याचा स्पष्ट संदेश समाजात गेला आहे. नागरिकांच्या सुरक्षिततेसाठी पुणे पोलीस सज्ज असून, कायदा व सुव्यवस्था अबाधित ठेवण्यासाठी अशाच प्रकारच्या कारवाया पुढेही सुरू राहतील, असे वरिष्ठ अधिकाऱ्यांनी स्पष्ट केले आहे.