पुणे : महापालिका निवडणुकीच्या पार्श्वभूमीवर पुणे शहरातील राजकीय वातावरण तापत असतानाच हडपसर परिसरातील काळेपडळ येथे धक्कादायक घटना घडली आहे. शिवसेना शहराध्यक्ष प्रमोद ऊर्फ नाना भानगिरे यांच्या वाहनावर प्रचारादरम्यान अज्ञात व्यक्तींनी दगडफेक केल्याचा प्रकार समोर आला आहे. या हल्ल्यात प्रभाग क्रमांक ४१ च्या उमेदवार सारिका पवार या गंभीर जखमी झाल्या असून त्यांच्यावर सध्या रुग्णालयात उपचार सुरू आहेत.
मिळालेल्या प्राथमिक माहितीनुसार, नाना भानगिरे आणि उमेदवार सारिका पवार हे आपल्या कार्यकर्त्यांसह काळेपडळ भागात प्रचार फेरीसाठी गेले होते. प्रचार सुरू असतानाच अचानक काही अज्ञात व्यक्तींनी त्यांना लक्ष्य करत जोरदार दगडफेक केली. या हल्ल्यात एक मोठा दगड थेट वाहनावर आदळल्याने गाडीचे नुकसान झाले असून, त्याच वेळी सारिका पवार यांना गंभीर दुखापत झाली.
घटनेनंतर परिसरात एकच खळबळ उडाली. स्थानिक नागरिकांमध्ये भीतीचे वातावरण निर्माण झाले असून काही काळ तणावाची स्थिती निर्माण झाली होती. जखमी सारिका पवार यांना तात्काळ उपचारासाठी नजीकच्या रुग्णालयात दाखल करण्यात आले. डॉक्टरांच्या माहितीनुसार त्यांची प्रकृती स्थिर असली तरी पुढील उपचार सुरू आहेत.
या घटनेनंतर शिवसेना पदाधिकारी व कार्यकर्त्यांनी तीव्र संताप व्यक्त केला असून, हा हल्ला लोकशाही प्रक्रियेवर आघात असल्याची प्रतिक्रिया दिली आहे. प्रचारादरम्यान उमेदवारांवर हल्ले होणे ही गंभीर बाब असून दोषींवर तात्काळ कठोर कारवाई करण्यात यावी, अशी मागणी करण्यात येत आहे.
दरम्यान, काळेपडळ पोलीस स्टेशन येथे गुन्हा दाखल करण्याची प्रक्रिया सुरू असून पोलिसांनी घटनास्थळी पाहणी केली आहे. परिसरातील सीसीटीव्ही फुटेज तपासण्यात येत असून, दगडफेक करणाऱ्या आरोपींचा शोध घेण्यासाठी विशेष पथक नेमण्यात आले आहे. आगामी निवडणुकीच्या पार्श्वभूमीवर कायदा व सुव्यवस्था अबाधित ठेवण्यासाठी पोलिसांनी बंदोबस्त वाढवण्याचे संकेत दिले आहेत. ही घटना पुणे शहरातील निवडणूक प्रचाराच्या सुरक्षेवर प्रश्नचिन्ह निर्माण करणारी असून, प्रशासनाने याकडे गांभीर्याने लक्ष देण्याची गरज व्यक्त केली जात आहे.
