पुणे | प्रतिनिधी —
पुणे शहरात वाढत्या मोबाईल स्नॅचिंगच्या घटनांना आळा घालण्यासाठी पुणे शहर गुन्हे शाखेच्या युनिट १ ने जलद आणि प्रभावी कारवाई करत जे.एम. रोड परिसरात मोबाईल हिसकावणाऱ्या आरोपीला अवघ्या २४ तासांच्या आत अटक केली आहे. या कारवाईमुळे नागरिकांमध्ये दिलासा व्यक्त केला जात आहे.
कॅबची वाट पाहताना घडली घटना
दि. ०४ जानेवारी २०२६ रोजी रात्री सुमारे १०:३० वाजता, जे.एम. रोडवरील जंगली महाराज मंदिरासमोर, शिवाजीनगर येथे फिर्यादी कॅबची वाट पाहत उभे असताना दुचाकीवरून आलेल्या दोन इसमांपैकी एकाने त्यांच्या हातातील ₹७०,००० किमतीचा सॅमसंग S-25 अल्ट्रा मोबाईल फोन हिसकावून घटनास्थळावरून पलायन केले होते. या प्रकरणी शिवाजीनगर पोलीस ठाण्यात गुन्हा दाखल करण्यात आला होता.
CCTV फुटेज आणि गुप्त बातमीदारांची मदत
गुन्हा दाखल होताच युनिट १, गुन्हे शाखेने समांतर तपास सुरू केला. घटनास्थळाजवळील CCTV फुटेजचे बारकाईने विश्लेषण करण्यात आले. त्याचबरोबर पोलीस अंमलदार डोंगरे व युवराज कांबळे यांना त्यांच्या गुप्त बातमीदारामार्फत महत्त्वाची माहिती मिळाली.
रेल्वे स्टेशनजवळ सापळा, आरोपी अटकेत
मिळालेल्या खात्रीशीर माहितीनुसार आरोपी हा शिवाजीनगर रेल्वे स्टेशन प्लॅटफॉर्म क्रमांक २ जवळील पार्किंग परिसरात येणार असल्याची माहिती मिळताच, पोलीस निरीक्षक अजित जाधव यांच्या मार्गदर्शनाखाली सापळा रचण्यात आला.
रात्री काही वेळातच संशयित इसम तेथे येताच, पोलिसांनी अतिशय शिताफीने त्याला ताब्यात घेतले.
आरोपीची ओळख व मुद्देमाल जप्त
अटक करण्यात आलेल्या आरोपीचे नाव
👉 राकेश गोवर्धन वाघीरे (वय २५)
रा. महात्मा गांधी वसाहत, पाटील इस्टेट, शिवाजीनगर, पुणे
असे असून, त्याच्या झडतीदरम्यान ₹७०,००० किमतीचा सॅमसंग मोबाईल फोन जप्त करण्यात आला आहे.
पुणे पोलिसांची सतर्कता, नागरिकांना दिलासा
या यशस्वी कारवाईमुळे पुणे पोलिसांची सतर्कता, तांत्रिक कौशल्य आणि गुन्हे उघडकीस आणण्याची क्षमता पुन्हा एकदा सिद्ध झाली आहे. सार्वजनिक ठिकाणी मोबाईल वापरताना नागरिकांनी सतर्क राहावे, असे आवाहनही पोलिसांकडून करण्यात आले आहे.
