नवी मुंबई | प्रतिनिधी — “Congratulations all Navi Mumbaikars. अख्खी मुंबई आता तुमच्याकडे येणार आहे…” अशा शब्दांत नवी मुंबईकरांनी सोशल मीडियावर आनंद, अभिमान आणि आत्मविश्वास व्यक्त केला आहे. नवी मुंबई आंतरराष्ट्रीय विमानतळाच्या प्रारंभानंतर नवी मुंबईचे महत्त्व केवळ वाढले नसून, तिची ओळखच बदलून गेली आहे.
एकेकाळी पश्चिम आणि मध्य उपनगरांतील (तर दक्षिण मुंबईचा उल्लेख न करताच) काही लोकांकडून नवी मुंबईकडे दुर्लक्ष किंवा तुच्छतेने पाहिले जात होते, अशी भावना अनेक नवी मुंबईकर व्यक्त करत आहेत. मात्र आज परिस्थिती पूर्णपणे बदलली आहे. आता मोठ्या संधी, करिअर, उद्योग, स्टार्टअप्स आणि स्वप्नांचा पाठपुरावा करायचा असेल, तर लोकांना नवी मुंबईकडे यावेच लागणार, असा ठाम विश्वास व्यक्त केला जात आहे.
सोशल मीडियावर व्हायरल होत असलेल्या पोस्ट्समध्ये नागरिक म्हणत आहेत की, नियोजनबद्ध शहररचना, रुंद रस्ते, उत्तम कनेक्टिव्हिटी, मेट्रो, सी-लिंक, ट्रान्स हार्बर लिंक आणि आता आंतरराष्ट्रीय विमानतळामुळे नवी मुंबई हे ‘भविष्यातील मुंबई’ बनत आहे. रोजगार, रिअल इस्टेट, शिक्षण, आरोग्य आणि जीवनमानाच्या बाबतीत नवी मुंबई आता अनेक बाबतीत पारंपरिक मुंबईपेक्षा पुढे जात असल्याची भावना दिसून येते.
विशेष म्हणजे, नव्या पिढीतील तरुण वर्ग नवी मुंबईला केवळ राहण्याचे शहर न मानता, स्वप्न पूर्ण करण्याचे व्यासपीठ मानू लागला आहे. “आता आम्हाला मुंबईत जायची गरज नाही, मुंबईच आमच्याकडे येणार आहे,” असे आत्मविश्वासपूर्ण वक्तव्य नागरिकांकडून केले जात आहे.
एकूणच, नवी मुंबई आंतरराष्ट्रीय विमानतळ आणि सुरू असलेल्या भव्य पायाभूत प्रकल्पांमुळे नवी मुंबईचा आत्मसन्मान उंचावला असून, हा केवळ विकासाचा नाही तर मानसिकतेत झालेल्या बदलाचाही विजय आहे, असेच चित्र सध्या सर्वत्र पाहायला मिळत आहे.
