पुणे | ख्रिसमस व नववर्षाच्या पार्श्वभूमीवर पुणे विभागाच्या राज्य उत्पादन शुल्क विभागाने बेकायदेशीर दारूविक्रीविरोधात मोठी मोहीम उघडली आहे. डिसेंबर महिन्यातच करण्यात आलेल्या विविध कारवायांमध्ये सुमारे ₹60 लाख किमतीची अवैध देशी व विदेशी दारू जप्त करण्यात आली असून 9 जणांना अटक करण्यात आली आहे. सणासुदीच्या काळात बेकायदेशीर मद्यविक्रीला आळा घालण्यासाठी विभागाने कठोर पावले उचलली आहेत.
उत्पादन शुल्क विभागाच्या माहितीनुसार, पुणे जिल्ह्यात एकूण 21 विशेष पथके तैनात करण्यात आली आहेत. ही पथके बेकायदेशीर दारूचे उत्पादन, वाहतूक, साठवणूक आणि विक्री यावर सतत नजर ठेवत आहेत. विशेषतः निवडणुकांचा कालावधी आणि सणासुदीमुळे दारूचा गैरवापर वाढण्याची शक्यता लक्षात घेऊन ही मोहीम राबवली जात आहे.
पहिली कारवाई – शेलपिंपळगाव, खेड
18 डिसेंबर 2025 रोजी सायंकाळी 7 वाजता, मिळालेल्या गोपनीय माहितीच्या आधारे चाकण–शिक्रापूर रोडवरील नदीपुलाजवळील पत्र्याच्या शेडवर छापा टाकण्यात आला. येथे ‘टँगो पंच’ या देशी दारूच्या बनावट लेबलसह 7,440 सीलबंद बाटल्या आढळून आल्या. या बाटल्यांवर खोटे बॅच नंबर, बनावट उत्पादन कंपनींची नावे वापरण्यात आली होती. यामध्ये मोबाईल फोनसह ₹3,60,200 किमतीचा मुद्देमाल जप्त करण्यात आला. या प्रकरणात वहिद साजिद शेख (रा. मेदनकरवाडी, चाकण) याला अटक करण्यात आली.
दुसरी कारवाई – चौकशीदरम्यान मोठा खुलासा
पहिल्या प्रकरणातील चौकशीतून पुढे जात ‘टँगो पंच’च्या आणखी 76 सीलबंद बाटल्या (90 मि.ली.) जप्त करण्यात आल्या. या प्रकरणात दिलीप गोविंद अक्कलवाड याला अटक करण्यात आली.
तिसरी कारवाई – हॉटेल भक्तीशा, कुरुळी
कुरुळी येथील हॉटेल भक्तीशा येथे छापा टाकून 18 बाटल्या (180 मि.ली.) व अतिरिक्त 90 मि.ली.च्या बाटल्या, मोबाईल फोनसह ₹3.73 लाखांचा मुद्देमाल जप्त करण्यात आला. या प्रकरणात अरविंद कैलास नाया याला अटक करण्यात आली.
चौथी कारवाई – संरक्षण दलांसाठी राखीव दारूचा गैरवापर
19 डिसेंबर 2025 रोजी, खेड तालुक्यातील वडगाव रोड, चोळी खुर्द येथील महालक्ष्मी किराणा स्टोअरवर छापा टाकण्यात आला. येथे दुकानामागील बेकायदेशीर साठ्यातून “For Defence Services Only” अशी खूण असलेल्या विदेशी दारूच्या 263 बाटल्या आढळल्या. यामध्ये Signature, Piper, Black Dog Reserve, Antiquity, Mansion House यांसारख्या नामांकित ब्रँड्सचा समावेश होता. या दारूची किंमत ₹9,06,475 असून महादेव माणिकराव पवार याला अटक करण्यात आली.
उत्पादन शुल्क विभागाचा इशारा
सुझीत पाटील, उपअधीक्षक, राज्य उत्पादन शुल्क विभाग (पुणे विभाग) यांनी सांगितले की, “जिल्ह्यातील दोन महापालिका निवडणुका तसेच ख्रिसमस व नववर्षाच्या पार्श्वभूमीवर 21 अंमलबजावणी पथके कार्यरत आहेत. सराईत गुन्हेगारांवर विशेष नजर ठेवण्यात येत असून रात्री गस्त, वाहन तपासणी कडक करण्यात आली आहे. गोव्याला जाणाऱ्या पर्यटकांच्या वाहनांवरही बारकाईने लक्ष ठेवले जात आहे.”
उत्पादन शुल्क विभागाच्या या कारवाईमुळे बेकायदेशीर दारूविक्रेत्यांचे धाबे दणाणले असून सणासुदीपूर्वी कायदा-सुव्यवस्था राखण्यासाठी प्रशासन सज्ज असल्याचे स्पष्ट झाले आहे.
