पुणे शहरातील कायदा-सुव्यवस्था अबाधित ठेवण्यासाठी पुणे पोलीस गुन्हे शाखा युनिट–३ यांनी आणखी एक महत्त्वपूर्ण यश मिळवले आहे. दरोड्यासारख्या गंभीर गुन्ह्यात पाहिजे असलेल्या आणि रेकॉर्डवरील गुन्हेगाराला अटक करून गुन्हे शाखेने शहरातील गुन्हेगारीवर कठोर संदेश दिला आहे.
दिनांक १४ डिसेंबर २०२५ रोजी गुन्हे शाखा युनिट–३ चे पोलीस अंमलदार वरिष्ठांच्या आदेशानुसार सिंहगड रोड, नांदेड सिटी व उत्तमनगर पोलीस स्टेशन हद्दीत पेट्रोलिंग करत होते. यावेळी पोलीस अंमलदार पुरुषोत्तम गुन्ला व योगेश झेंडे यांना गोपनीय बातमीदारामार्फत खात्रीलायक माहिती मिळाली की, उत्तमनगर पोलीस स्टेशन गु.र.नं. १४५/२०२५ मधील पाहिजे आरोपी साईराज अतुल तावरे (वय १९ वर्षे, रा. तुकाईनगर समाजमंदिराजवळ, वडगाव बु. पुणे) हा आपल्या घरी आला आहे.
मिळालेल्या माहितीच्या आधारे गुन्हे शाखा युनिट–३ च्या पथकाने तात्काळ हालचाल करत अत्यंत शिताफीने सापळा रचून आरोपीला ताब्यात घेतले. प्राथमिक चौकशीत आरोपीने सदर गुन्ह्यात आपला सहभाग असल्याची कबुली दिली आहे. तसेच त्याचा गुन्हे अभिलेख तपासला असता, तो रेकॉर्डवरील गुन्हेगार असल्याचे निष्पन्न झाले आहे.
सदर आरोपीविरोधात भारतीय न्याय संहिता कलम ३०९(६), ३३३, ३(५), ३२४(४), भारतीय हत्यार कायदा कलम ४ व २५ तसेच महाराष्ट्र पोलीस अधिनियम ३७(१)(सी), १३५ अन्वये गंभीर स्वरूपाचे गुन्हे दाखल आहेत. या अटकेमुळे दरोड्यासारख्या गंभीर गुन्ह्यांच्या तपासाला मोठी चालना मिळाली असून, भविष्यातील गुन्हे उघडकीस येण्याची शक्यता पोलीस सूत्रांकडून वर्तवण्यात येत आहे. ही उल्लेखनीय कारवाई मा. अपर पोलीस आयुक्त (गुन्हे) पुणे शहर श्री. पंकज देशमुख, मा. पोलीस उप आयुक्त (गुन्हे) श्री. निखिल पिंगळे तसेच मा. सहायक पोलीस आयुक्त (गुन्हे–१) श्री. विजय कुंभार यांच्या मार्गदर्शनाखाली पार पडली.
कारवाईत सहाय्यक पोलीस निरीक्षक ज्ञानेश्वर ढवळे, पोलीस अंमलदार पंढरीनाथ शिंदे, अमोल काटकर, किशोर शिंदे, पुरुषोत्तम गुन्ला, योगेश झेंडे, तुषार किंद्रे यांनी महत्त्वाची भूमिका बजावली. या अटकेमुळे पुणे शहरात गुन्हेगारी प्रवृत्तीवर वचक बसणार असून, नागरिकांच्या सुरक्षिततेसाठी पुणे पोलीस सतर्क असल्याचा ठाम संदेश पुन्हा एकदा देण्यात आला आहे.
