पुणे विमानतळावरून प्रवास करणाऱ्या प्रवाशांसाठी महत्त्वाची बातमी समोर आली आहे. ऑपरेशनल कारणांमुळे इंडिगो एअरलाइन्सने १५ डिसेंबर ते ३१ डिसेंबर २०२५ दरम्यान पुण्याशी संबंधित काही नियोजित उड्डाणे तात्पुरती रद्द केली आहेत, अशी माहिती विमानतळ प्राधिकरण (AAI) अधिकाऱ्यांनी दिली आहे.
AAI कडून देण्यात आलेल्या माहितीनुसार, रद्द करण्यात आलेल्या उड्डाणांमध्ये गुवाहाटी–पुणे (6E 746), पुणे–चेन्नई (6E 918), वाराणसी–पुणे (6E 6884), पुणे–वाराणसी (6E 497), बंगळुरू–पुणे (6E 6876) आणि पुणे–बंगळुरू (6E 6877) या महत्त्वाच्या मार्गांचा समावेश आहे. या उड्डाणांवर मोठ्या प्रमाणात प्रवासी अवलंबून असल्याने अनेकांच्या प्रवास योजनांवर परिणाम होण्याची शक्यता आहे.
AAI अधिकाऱ्यांनी स्पष्ट केले की, ही रद्दबातल उड्डाणे डिसेंबर अखेरपर्यंतच मर्यादित असून, प्रवाशांना कमीत कमी त्रास होईल यासाठी एअरलाइन्ससोबत सातत्याने समन्वय साधला जात आहे. “ही तात्पुरती सेवा स्थगिती असली तरी प्रवाशांना कोणतीही गैरसोय होऊ नये, यासाठी आम्ही इंडिगोसोबत जवळून काम करत आहोत,” असे अधिकाऱ्यांनी सांगितले.
पुणे विमानतळाचे संचालक संतोष धोके यांनी सांगितले की, “या उड्डाणांसाठी तिकीट बुक केलेल्या प्रवाशांना एअरलाइन्सच्या नियमानुसार पर्यायी प्रवासाची व्यवस्था किंवा पूर्ण परतावा (रिफंड) देण्यात यावा, याबाबत स्पष्ट सूचना देण्यात आल्या आहेत.” यासोबतच पुणे विमानतळावर स्वतंत्र कंट्रोल रूम स्थापन करण्यात आली असून, उड्डाण हालचालींवर सतत लक्ष ठेवले जात आहे.
AAI कडून प्रवाशांना आवाहन करण्यात आले आहे की, संबंधित उड्डाणांवर तिकीट बुक केलेल्या प्रवाशांनी इंडिगोच्या अधिकृत वेबसाईट, मोबाईल अॅप किंवा कस्टमर केअरशी थेट संपर्क साधावा. तसेच विमानतळाकडे निघण्यापूर्वी आपल्या उड्डाणाची सद्यस्थिती पुन्हा एकदा तपासावी, जेणेकरून शेवटच्या क्षणी होणारा त्रास टाळता येईल. सणासुदीच्या आणि वर्षअखेरीच्या काळात प्रवाशांची संख्या मोठ्या प्रमाणात वाढत असल्याने, अशा रद्दबातल उड्डाणांमुळे प्रवाशांनी अधिक सावधगिरी बाळगण्याची गरज असल्याचेही प्रशासनाकडून स्पष्ट करण्यात आले आहे.
