मुंबई | मुंबई महानगरपालिकेत तब्बल २५ वर्षे सत्ताधारी राहून शिवसेना (उद्धव बाळासाहेब ठाकरे) पक्षाने मुंबईकरांना अभिमान वाटेल अशी भरीव आणि दूरदृष्टीपूर्ण विकासकामे केली असल्याचे ठामपणे मांडत ‘करून दाखवलंय ते अभिमानाने सांगूया!’ या संकल्पनेअंतर्गत भव्य सादरीकरण आज वरळी येथील एन.एस.सी.आय. डोम येथे पार पडले. हे सादरीकरण युवासेनाप्रमुख आणि शिवसेना नेते आमदार आदित्य ठाकरे यांनी सादर केले.
या कार्यक्रमात मुंबई महानगरपालिकेतील शिवसेनेच्या कार्यकाळात करण्यात आलेल्या पायाभूत सुविधा, आरोग्य सेवा, शिक्षण, पर्यावरण, रस्ते, पाणीपुरवठा, ड्रेनेज, उद्याने, सार्वजनिक वाहतूक आणि कोविड काळातील महत्त्वपूर्ण कामगिरी यांचा सविस्तर आढावा घेण्यात आला. “फक्त घोषणा नाही, तर काम करून दाखवलंय,” असा ठाम संदेश या सादरीकरणातून देण्यात आला.
“ही मुंबई आपली आहे, मुंबईकरांची आहे”
आदित्य ठाकरे यांनी आपल्या भाषणात मुंबईच्या अस्मितेचा मुद्दा ठळकपणे मांडला.
“ही मुंबई आपली आहे, मुंबईकरांची आहे. त्यामुळे या शहरावर पहिला अधिकार मुंबईकरांचाच असायला हवा,” असे सांगत त्यांनी मुंबईच्या भविष्यासंदर्भात चिंता व्यक्त केली.
“मुंबई अदानीस्तान होऊ देऊ नका”
यावेळी बोलताना आदित्य ठाकरे यांनी थेट इशारा देत सांगितले की,
“मुंबई अदानीस्तान होऊ देऊ नका. मुंबई काही मोजक्या उद्योगपतींसाठी नाही, तर सामान्य मुंबईकरांसाठी आहे.”
मुंबईतील जमीन, बंदरे, सार्वजनिक मालमत्ता आणि महत्त्वाच्या प्रकल्पांवर खासगीकरणाच्या नावाखाली होणाऱ्या घुसखोरीला विरोध करण्याचे आवाहन त्यांनी केले.
पर्यावरण आणि शहराचा समतोल विकास
मुंबईच्या विकासासोबतच पर्यावरणाचा समतोल, हरित क्षेत्रांचे संरक्षण आणि शाश्वत विकास हा शिवसेनेचा कायमचा अजेंडा असल्याचेही त्यांनी अधोरेखित केले. येणाऱ्या काळात मुंबईला लोकाभिमुख, समावेशक आणि सुरक्षित शहर बनवण्यासाठी शिवसेना कटिबद्ध असल्याचे त्यांनी स्पष्ट केले.
“चला, सज्ज होऊया!”
कार्यक्रमाच्या शेवटी आदित्य ठाकरे यांनी मुंबईकरांना साद घालत म्हटले –
“चला, सज्ज होऊया! आपली मुंबई आपल्यालाच वाचवायची आहे.”
मुंबईच्या स्वाभिमानासाठी, अधिकारांसाठी आणि भविष्य सुरक्षित ठेवण्यासाठी एकत्र येण्याचे आवाहन त्यांनी केले.
या सादरीकरणाला शिवसेना पदाधिकारी, युवासैनिक, माजी नगरसेवक, सामाजिक कार्यकर्ते आणि मोठ्या संख्येने मुंबईकर उपस्थित होते. कार्यक्रमातून आगामी महानगरपालिका निवडणुकांच्या पार्श्वभूमीवर शिवसेनेची दिशा आणि भूमिका स्पष्टपणे मांडण्यात आली, असे राजकीय निरीक्षकांचे मत आहे.
