पुणे शहरात दिवसा घरफोडीच्या घटनांमध्ये वाढ होत असताना समर्थ पोलीस स्टेशनने मोठी आणि उल्लेखनीय कामगिरी केली आहे. मंगळवार पेठ परिसरात दिवसा घरफोडी करून लाखोंचा ऐवज लंपास करणाऱ्या सराईत गुन्हेगारांच्या टोळीला पोलिसांनी जेरबंद केले असून, त्यांच्याकडून चोरीचा मोठा मुद्देमाल हस्तगत करण्यात आला आहे.
दि. १८ नोव्हेंबर २०२५ रोजी मंगळवार पेठ येथील एका नागरिकाच्या बंद घराचे कुलूप तोडून अज्ञात चोरट्यांनी घरात प्रवेश केला. यावेळी सोन्या-चांदीचे दागिने आणि रोख रक्कम असा सुमारे ७ लाख २९ हजार रुपयांचा ऐवज चोरीला गेला होता. या प्रकरणी समर्थ पोलीस स्टेशनमध्ये गुन्हा दाखल होताच पोलिसांनी तपासाला गती दिली.
घटनास्थळी उपलब्ध सीसीटीव्ही फुटेज, तांत्रिक विश्लेषण आणि गोपनीय बातमीदारांच्या माहितीद्वारे पोलिसांनी संशयितांचा माग काढला. त्यानुसार सुनिल मल्हारी तलवारे (वय ३८, रा. आकुर्डी, पुणे) व एक विधीसंघर्षित बालक यांना ताब्यात घेण्यात आले. चौकशीत त्यांनी सदर घरफोडी केल्याची कबुली दिली तसेच चोरीतील दागिने विक्रीसाठी शिवानंद दशरथ मोची उर्फ मोची मामा (वय ४०, रा. चिखली, पुणे) याच्याकडे दिल्याची माहिती उघड झाली.
यानंतर पोलिसांनी तात्काळ कारवाई करत शिवानंद मोची यालाही अटक केली. आरोपींकडून सोन्याचे-चांदीचे दागिने व १० हजार रुपये रोख असा एकूण ८ लाख ११ हजार रुपयांचा मुद्देमाल जप्त करण्यात आला आहे. पुढील तपासात या आरोपींनी पुणे शहरासह खराडी, चंदननगर तसेच रायगड जिल्ह्यातील महाड येथेही घरफोडीचे गुन्हे केल्याचे निष्पन्न झाले आहे.
या यशस्वी कारवाईमुळे पुणे शहरातील घरफोडी करणाऱ्या टोळ्यांना मोठा धक्का बसला असून, नागरिकांमध्ये सुरक्षिततेचा विश्वास अधिक दृढ झाला आहे. समर्थ पोलिसांची ही कामगिरी गुन्हेगारीविरोधातील ठोस आणि परिणामकारक कारवाईचे उदाहरण ठरत आहे.
