पिंपरी-चिंचवड : चिखली आणि जाधववाडी परिसरातील नागरिकांना आज (मंगळवार, ११ नोव्हेंबर २०२५) पाणीटंचाईचा सामना करावा लागणार आहे. निगडी भक्ती शक्ती चौकात सुरू असलेल्या मेट्रो प्रकल्पाच्या कामासाठी सेक्टर २३ येथील जलशुद्धीकरण केंद्रातून चिखली-जाधववाडी परिसराकडे जाणारी मुख्य जलवाहिनी स्थलांतरित करण्याचं काम महापालिकेच्या पाणीपुरवठा विभागामार्फत हाती घेण्यात आलं आहे.
या जलवाहिनी स्थलांतराच्या पार्श्वभूमीवर आज संध्याकाळचा पाणीपुरवठा पूर्णतः बंद राहील, अशी माहिती महापालिकेकडून देण्यात आली आहे. चिखलीतील जाधववाडी परिसर, मोईफाटा ते रिव्हर चौक, किनारा सोसायटी आणि आजूबाजूचे भाग या बंदीच्या क्षेत्रात येत आहेत. तसेच, बुधवार (१२ नोव्हेंबर) रोजी सकाळचा पाणीपुरवठा अनियमित आणि कमी दाबाने होणार असल्याचंही मनपाने स्पष्ट केलं आहे.
महापालिकेने नागरिकांना आवाहन केलं आहे की, “सदर कालावधीसाठी पाण्याचा पुरेसा साठा करून ठेवावा आणि पाणी काटकसरीने वापरून प्रशासनास सहकार्य करावं.” तसेच, पाईपलाईनचे स्थलांतर सुरळीत पार पडावे यासाठी विभागीय अभियंते आणि तांत्रिक कर्मचारी यांना सतत उपस्थित राहण्याच्या सूचना देण्यात आल्या आहेत.
या कामामुळे काही काळासाठी असुविधा होऊ शकते, परंतु हे काम पूर्ण झाल्यानंतर मेट्रोच्या रस्त्याच्या विस्तारीकरणासह जलवाहिनी अधिक सुरक्षित आणि सुलभ पद्धतीने बसवली जाईल, अशी माहिती मनपाच्या जलपुरवठा विभागातील वरिष्ठ अधिकाऱ्यांनी दिली आहे. या पार्श्वभूमीवर अनेक सोसायट्यांमध्ये पाणी साठवणीची तयारी सुरू असून, नागरिक सोशल मीडियावरून एकमेकांना “पाणी जपून वापरा” असा संदेश देत आहेत.
