चतुःश्रृंगी पोलिसांची मोठी कारवाई! बाणेरमधील ‘फार्म कॅफे’ शेतात चालणारा अवैध हुक्का बार उध्वस्त — ४८,६५० रुपयांचा मुद्देमाल जप्त

पुणे :- पुणे शहर पोलिसांच्या चतुःश्रृंगी पोलिसांनी औंध-बाणेर लिंक रोडवरील शेतात अनधिकृतरित्या चालणारा हुक्का बार उध्वस्त करून अवैध व्यवसायाला आळा घातला आहे. या कारवाईत पोलिसांनी सुमारे ४८,६५० रुपयांचा मुद्देमाल जप्त केला असून, या प्रकरणी जागेचा मालक, व्यवस्थापक आणि कामगारांसह पाच जणांविरुद्ध गुन्हा दाखल करण्यात आला आहे.

ही धडक कारवाई ८ नोव्हेंबर २०२५ रोजी कॉम्बिंग ऑपरेशनदरम्यान करण्यात आली. तपास पथकातील अधिकाऱ्यांना गुप्त माहिती मिळाली होती की, ‘फार्म कॅफे’ (सर्वे नं. २२४, औंध-बाणेर लिंक रोड) या ठिकाणी शेतामध्ये बेकायदेशीररीत्या हुक्का बार सुरू आहे. माहितीची खात्री करून पोलिसांनी छापा टाकला असता, ग्राहकांना तंबाखूजन्य हुक्का फ्लेव्हर पुरवले जात असल्याचे आणि धुम्रपानासाठी अवैध हुक्का वापरले जात असल्याचे स्पष्ट झाले.

या ठिकाणाहून पोलिसांनी २० हुक्का पॉट्स, तंबाखूजन्य फ्लेव्हर, पाईप्स आणि इतर साहित्य जप्त केले. या प्रकरणी चतुःश्रृंगी पोलीस ठाण्यात गु.र.नं. ४४७/२०२५, सिगारेट व अन्य तंबाखुजन्य उत्पादने (महाराष्ट्र सुधारणा) अधिनियम-२०१८ चे कलम ४(अ), २१(अ) अंतर्गत गुन्हा दाखल करण्यात आला आहे. या कारवाईचा अधिक तपास सहाय्यक पोलीस निरीक्षक अनिकेत पोटे करत आहेत. त्यांनी आपल्या पथकासह अत्यंत दक्षता आणि वेगाने कारवाई पार पाडली.

ही संपूर्ण कारवाई मा. अपर पोलीस आयुक्त श्री. मनोज पाटील, मा. पोलीस उपआयुक्त (परिमंडळ ४) श्री. सोमय मुंडे, तसेच सहा. पोलीस आयुक्त श्री. विठ्ठल दबडे यांच्या मार्गदर्शनाखाली करण्यात आली. वरिष्ठ पोलीस निरीक्षक उत्तम भजनावळे आणि पोलीस निरीक्षक (गुन्हे) श्रीमती आश्विनी ननावरे यांच्या नेतृत्वाखालील पथकाने ही कामगिरी यशस्वी केली.

तपास पथकातील पोलीस अंमलदार बाबासाहेब दांगडे, इरफान मोमीन, श्रीकांत वाघवले, बाबुलाल तांदळे, वाघेश कांबळे आणि तुषार गिरंगे यांनी या छाप्यामध्ये सक्रिय सहभाग घेतला.

पोलिसांनी स्पष्ट केले आहे की, शहरातील हुक्का बार्स, बेकायदेशीर नशेचे ठिकाणे आणि तरुणांना व्यसनाकडे ढकलणारे सर्व केंद्रांवर कठोर कारवाई केली जाईल. ही कारवाई पुणे पोलिसांच्या दक्षतेचा आणि जनतेच्या सुरक्षेप्रती असलेल्या कटिबद्धतेचा प्रत्यय देणारी आहे.