नवी मुंबई : आयसीसी महिला एकदिवसीय विश्वचषक २०२५ चा दुसरा उपांत्य सामना आज (गुरुवार, दि. ३०) नवी मुंबईतील डीवाय पाटील स्टेडियमवर भारत आणि ऑस्ट्रेलिया या दोन दिग्गज संघांमध्ये रंगणार आहे. हा सामना दुपारी ३:०० वाजता सुरू होणार असून नाणेफेक दुपारी २:३० वाजता पार पडेल.
क्रिकेटप्रेमींसाठी हा सामना म्हणजे ‘मिनी फायनल’च आहे. भारतीय महिला संघाला या सामन्यात आपला सर्वोत्तम खेळ करावा लागणार आहे, कारण ऑस्ट्रेलियासारख्या अनुभवी आणि सात वेळा विजेते ठरलेल्या संघाविरुद्ध विजय मिळवणे सोपं नाही. तरीही हरमनप्रीत कौरच्या नेतृत्वाखालील भारतीय संघ या वेळी इतिहास रचण्याच्या निर्धाराने मैदानात उतरणार आहे.
भारताने गट फेरीत काही चढ-उतार अनुभवले असले तरी, त्यांनी उपांत्य फेरीत प्रवेश मिळवला आणि आता जेतेपदापासून फक्त दोन पावलांवर उभा आहे. स्मृती मानधना आणि शेफाली वर्मा यांच्या आक्रमक फलंदाजीवर संघाचे मोठे अवलंबित्व असेल, तर रेणुका ठाकूर आणि दीप्ती शर्मा यांच्या गोलंदाजीवर विजयाची आशा असेल.
ऑस्ट्रेलियाने या स्पर्धेत अजूनपर्यंत एकही सामना गमावलेला नाही. त्यांची सातत्यपूर्ण कामगिरी, अनुभवी फलंदाज आणि मजबूत गोलंदाजी हे त्यांच्या यशाचे गमक आहे. एलिसा हिलीच्या नेतृत्वाखालील संघ अपराजित राहिला असून त्यांचा आत्मविश्वास उच्चांकावर आहे.
डीवाय पाटील स्टेडियमची खेळपट्टी फलंदाजांना अनुकूल मानली जाते. त्यामुळे दोन्ही संघांतील फलंदाजांची चुरस पाहायला मिळणार आहे. फिरकी गोलंदाजांना काही प्रमाणात मदत मिळण्याची शक्यता असल्याने भारताला येथे थोडा फायदा होऊ शकतो.
मात्र, हवामान अंदाजानुसार पावसाचा धोका या सामन्याला गालबोट लावू शकतो. गुरुवारी तसेच राखीव दिवशी (शुक्रवार) पावसाची शक्यता आहे. जर दोन्ही दिवशी सामना पूर्ण झाला नाही, तर गुणतालिकेत आघाडीवर असलेल्या ऑस्ट्रेलियाला थेट अंतिम फेरीत प्रवेश मिळेल, आणि भारत स्पर्धेबाहेर पडू शकतो.
२०१७ च्या विश्वचषकातील उपांत्य सामन्यात हरमनप्रीत कौरने खेळलेली नाबाद १७१ धावांची ऐतिहासिक खेळी आजही चाहत्यांच्या मनात कोरलेली आहे. पुन्हा एकदा तीच जिद्द आणि लढाऊ वृत्ती दाखवत भारतीय संघ अंतिम फेरीत धडक मारतो का, याकडे सर्वांचे लक्ष लागले आहे.
क्रिकेटप्रेमींना हा सामना स्टार स्पोर्ट्स नेटवर्कवर आणि जिओ हॉटस्टारवर थेट पाहता येणार आहे. भारतीय संघासाठी ही फक्त उपांत्य फेरी नाही — तर ‘गौरव, इतिहास आणि सन्मान’ जपण्याची लढाई आहे. आज सगळ्यांच्या नजरा नवी मुंबईकडे लागल्या आहेत!
