मुंबई | सायबर सुरक्षेच्या जगतात थरकाप उडवणारी घटना मुंबईतून समोर आली आहे. आदित्य बिर्ला कॅपिटलच्या (ABCD App) ४३५ ग्राहकांच्या खात्यांमधून सुमारे १.९५ कोटी रुपयांचे डिजिटल सोने OTP प्रक्रियेला बायपास करून परस्पर विकण्यात आले. या गुन्ह्यामुळे सायबर क्षेत्रात खळबळ उडाली असून, सायबर सुरक्षेवर मोठे प्रश्नचिन्ह उपस्थित झाले आहे.
हॅकिंगचा अत्याधुनिक प्रकार – OTP चा बायपास!
या प्रकरणात हॅकिंगची एक अतिशय प्रगत पद्धत वापरण्यात आली. हॅकरने digital.adityabirlacapital.com या वेबसाईटवरील API हॅक करून OTP पडताळणी प्रक्रियेतच बदल केले. परिणामी, ग्राहकांच्या संमतीशिवाय त्यांच्या खात्यातील डिजिटल सोनं एका झटक्यात विकलं गेलं.
ग्राहकांच्या तक्रारीतून उघडकीस आला प्रकार
ग्राहकांच्या संमतीशिवाय सोनं विकल्याच्या अनेक तक्रारी कॉल सेंटरला मिळाल्यानंतर कंपनीच्या टेक्निकल टीमने तपास सुरू केला आणि हा भीषण प्रकार उघडकीस आला. तत्काळ मुंबई सेंट्रल रिजन सायबर पोलिसांकडे FIR दाखल करण्यात आला असून चौकशी सुरू आहे.
सायबर तज्ज्ञ डॉ. धनंजय देशपांडे यांचा गंभीर इशारा
“OTP बायपास करणं म्हणजे सायबर सुरक्षेतील अत्यंत धोकादायक टप्पा आहे,” असं सांगत डॉ. धनंजय देशपांडे (dd) यांनी लोकांना ऑनलाईन गुंतवणुकीबाबत विशेष सावधगिरी बाळगण्याचा सल्ला दिला आहे. “गुंतवणुकीसाठी विश्वासार्ह ब्रोकर किंवा कंपनीच्या अधिकृत कर्मचार्यांद्वारेच व्यवहार करावेत,” असे त्यांनी स्पष्ट केले.
सायबर सुरक्षिततेबाबत जनजागृतीची गरज
या घटनेवरून स्पष्ट होते की सायबर फसवणूक आता अधिक सुसंस्कृत आणि धोकादायक झाली आहे. OTP जसं सुरक्षित मानलं जातं, तेच आता बायपास केलं जातंय! त्यामुळे डिजिटल व्यवहार करताना, अगदी बँकिंग, ट्रेडिंग, इन्व्हेस्टमेंट असो – प्रत्येक टप्प्यावर दक्षता आवश्यक आहे.
संबंधितांनी ‘सायबर क्राईम हेल्पलाइन’वर तक्रार करावी
पीडितांनी त्वरित 1930 या सायबर क्राईम हेल्पलाइन क्रमांकावर तक्रार नोंदवावी, असे आवाहन सायबर अवेअरनेस फाउंडेशनचे HOD डॉ. देशपांडे यांनी केले.
डिजिटल सावधगिरीचे सोनेरी नियम
अनोळखी लिंक, अॅप्स आणि ईमेल्सपासून सावध रहा
OTP कुणालाही सांगू नका, स्क्रीन शेअर करू नका
मोठी गुंतवणूक करताना फिजिकल व्हेरिफिकेशन करा
ऑनलाईन व्यवहारानंतर खात्याची नियमित तपासणी करा
सायबर क्राईम संदर्भात कोणतीही शंका असल्यास त्वरित तक्रार नोंदवा
या घटनेमुळे संपूर्ण वित्त क्षेत्रात खळबळ उडाली असून, ABCD App च्या सुरक्षिततेवर गंभीर प्रश्न उपस्थित झाले आहेत.
