पुणे | २१ जून २०२५ :- पुणे शहर पोलीस दलात एका अत्यंत लज्जास्पद आणि धक्कादायक प्रकाराने खळबळ माजवली आहे. डेक्कन पोलीस ठाण्यातील दोन अंमलदारांनीच एका तरुणाला खोट्या तक्रारीच्या नावाखाली अटक करण्याची धमकी देत थेट एटीएममध्ये नेऊन त्याच्याकडून तब्बल २०,००० रुपये उकळल्याची घटना उघडकीस आली आहे.
कायद्याचे रक्षक की भक्षक?
पोलीस हे समाजाच्या सुरक्षेसाठी असतात, पण जेव्हा हेच रक्षक खंडणी वसूल करणारे ठरतात, तेव्हा नागरिकांचा विश्वास हादरतो. डेक्कन पोलीस ठाण्याच्या मोबाईल व्हॅनमध्ये तैनात असलेल्या दोन अंमलदारांनी एका सामान्य नागरिकाला अटक करण्याची धमकी देत त्याच्याकडून रक्कम वसूल केली. कायद्याच्या नियमांचे उल्लंघन करत त्यांनी कोणतीही अधिकृत कारवाई न करता संबंधित व्यक्तीला रक्कम घेतल्यावर सोडून दिले.
अधिकाऱ्यांची तत्काळ कारवाई
घटनेची माहिती मिळताच पोलिस उपायुक्त निखिल पिंगळे यांनी तत्काळ दोन्ही अंमलदारांना निलंबित केले असून, याप्रकरणी चौकशी सुरू करण्यात आली आहे. अशा अधिकाऱ्यांमुळे संपूर्ण पोलीस दलाची बदनामी होत असून, कठोर कारवाईचे संकेत दिले आहेत.
घटनाक्रम कसा घडला?
गणेश देसाई नावाच्या व्यक्तीच्या दुचाकीवर मागे बसून हा युवक कमला नेहरू पार्कजवळील एटीएममध्ये गेला.
तिथून २०,००० रुपये काढून दोन्ही अंमलदारांना दिले.
कोणतीही गुन्ह्याची नोंद किंवा कारवाई न करता त्यांनी त्या युवकाला सोडून दिले.
यामुळे कर्तव्यात कसूर आणि पोलीस खात्याची प्रतिमा मलीन करणाऱ्या या वर्तनावर कठोर निलंबनाची कारवाई करण्यात आली आहे.
नागरिकांनी काय करावे?
पोलिसांकडून अशा प्रकारची धमकी किंवा अवैध मागणी झाल्यास तात्काळ पोलिस आयुक्तालय किंवा संबंधित वरिष्ठ अधिकार्यांशी संपर्क साधावा. आता सर्व पोलीस ठाण्यांमध्ये सीसीटीव्ही आणि GPS ट्रॅकिंगचा वापर वाढविण्याची मागणी नागरिकांकडून जोर धरू लागली आहे.
लोकांची भावना:
“जे पोलीस रात्रंदिवस कष्ट करून समाजरक्षण करतात, त्यांच्यामुळे आम्हाला अभिमान वाटतो. पण अशा काही अपवादात्मक घटनांमुळे संपूर्ण खात्याची प्रतिमा मलीन होते. अशा भ्रष्ट पोलीस कर्मचाऱ्यांवर कठोर कारवाई व्हावी,” असे नागरिकांकडून बोलले जात आहे.
