पुणे | १० जून २०२५ :- शहरातील नागरिकांची फसवणूक करण्यासाठी एटीएम मशीनमध्ये काळी पट्टी लावून बनावट तांत्रिक बिघाड निर्माण करणाऱ्या दोन सराईत आरोपींना समर्थ पोलीस स्टेशनच्या पथकाने अत्यंत शिताफीने अटक केली. या आरोपींनी आधीही अशा प्रकारची फसवणूक केली असल्याचे तपासात निष्पन्न झाले आहे.
घटनाक्रम: दि. ५ जून २०२५ रोजी रात्री ८:०५ वाजता, रास्ता पेठ येथील बँक ऑफ इंडिया एटीएममध्ये पैसे काढण्यासाठी गेलेल्या नागरिकाला पैसे न मिळाल्यामुळे फसवणूक झाल्याची तक्रार समर्थ पोलीस ठाण्यात दाखल करण्यात आली होती. सदर गुन्हा भा.दं.वि. कलम ३१८(४), ३(५) अंतर्गत नोंदवण्यात आला.
गुन्हेगारांचा शोध आणि अटक: वरिष्ठ अधिकाऱ्यांच्या आदेशावरून समर्थ पोलिसांचे तपास पथक सतर्क झाले. त्यांनी लगेचच एटीएमजवळ सापळा रचला. दुसऱ्याच दिवशी, म्हणजेच ६ जून रोजी, राज रेस्टॉरंट समोर असलेल्या बँक ऑफ इंडिया एटीएममध्ये दोन संशयित इसम स्क्रू ड्रायव्हर घेऊन छेडछाड करताना आढळून आले.
त्यांना ताब्यात घेतल्यावर त्यांनी आपली नावे खालीलप्रमाणे सांगितली: 🔹 संतोष कुमार किशोरीलाल सरोज (२८), मूळ राहणार – प्रतापगढ, उत्तर प्रदेश 🔹 प्रदीप कुमार नंदकिशोर मौर्या (२६), मूळ राहणार – प्रतापगढ, उत्तर प्रदेश सध्या दोघेही पुण्यात फिरस्ते म्हणून वास्तव्य करत होते.
गुन्ह्याची कबुली आणि तपासातील खुलासे: दोघांनी कबुली दिली की त्यांनी दि. ५ जून रोजी एटीएममध्ये एक काळी पट्टी लावून पैसे अडकवले. दुसऱ्या दिवशी ते पैसे परत मिळवण्यासाठी आले होते. त्यांच्याकडून ४ विविध बँकांचे एटीएम कार्ड, छेडछाड केलेली काळी पट्टी व रोख रक्कम जप्त करण्यात आली आहे.
पूर्वीचा आपराधिक इतिहास: या आरोपींविरुद्ध वारजे माळवाडी पोलीस ठाण्यात देखील एटीएम फसवणुकीचा गुन्हा नोंद असल्याचे समोर आले आहे.
पोलीस प्रशासनाची तत्परता: समर्थ पोलीस ठाण्याच्या अधिकारी आणि कर्मचाऱ्यांनी केलेल्या वेळीच कारवाईमुळे नागरिकांची अधिक फसवणूक होण्यापासून रोखण्यात यश आले आहे. गुन्ह्यातील आर्थिक व्यवहारांची चौकशी व आरोपींनी आणखी कुठे फसवणूक केली आहे का, याचा तपास सुरु आहे.
समर्थ पोलीस स्टेशनचे तपास पथक: ▪️ वरिष्ठ पोलीस निरीक्षक यांचे नेतृत्व ▪️ स्थानिक पोलीस कर्मचारी व गुन्हे शाखेचा सहकार्य ▪️ एटीएम परिसरातील CCTV तपासणी ▪️ तत्काळ कारवाईने मोठा अनर्थ टळला
