पुणे | ६ जून २०२५ – पुणे शहरात पुन्हा एकदा अनैसर्गिक संबंधावरून निर्माण झालेल्या वादातून खून झाल्याची धक्कादायक घटना उघडकीस आली आहे. मंडई मेट्रो स्टेशनसमोरील इमारतीच्या पार्किंगमध्ये एका अज्ञात व्यक्तीचा मृतदेह रक्ताच्या थारोळ्यात आढळल्याने खळबळ उडाली.
पोलिसांनी घटनेची गंभीर दखल घेत अवघ्या २४ तासांत आरोपी रमेश प्रकाश सत्रे (वय २१, रा. कातरड, ता. राहुरी, जि. अहिल्यानगर) याला अटक करून गुन्हा उघडकीस आणण्यात यश मिळवलं आहे.
घटनेचा तपशील:
४ जून रोजी विश्रामबाग पोलीस ठाण्याच्या हद्दीतील मंडई मेट्रो स्टेशनसमोरच्या इमारतीच्या पार्किंगमध्ये एका ५० ते ५५ वयोगटातील अज्ञात इसमाचा मृतदेह सापडला. माहिती मिळताच पोलिसांनी तत्काळ घटनास्थळी धाव घेतली. गंभीर जखमी स्थितीत त्या व्यक्तीस ससून रुग्णालयात नेले असता डॉक्टरांनी त्याला मृत घोषित केले.
खुनाचा गुन्हा दाखल:
पोलिसांनी तातडीने भादंवि कलम १०३ (१) नुसार अज्ञात आरोपीविरुद्ध खुनाचा गुन्हा दाखल केला. प्रकरण गंभीर असल्याने वरिष्ठ अधिकाऱ्यांच्या मार्गदर्शनाखाली विशेष तपास पथक गठीत करण्यात आले.
तपासाची दिशा व आरोपीचा शोध:
घटनास्थळावरील गुप्त बातमीदार आणि तांत्रिक विश्लेषणाच्या मदतीने तपास पुढे नेण्यात आला. मृत व्यक्तीच्या ओळखीचा आणि आरोपीचा मागोवा घेण्यात आला. संशयित रमेश सत्रे हा शिरूरमधील आपल्या भावाच्या फ्लॅटमध्ये लपल्याची माहिती मिळाल्यावर युनिट ०१ चे पोलीस ताफा तेथे रवाना झाला व त्याला अटक करण्यात आली.
खुनामागचं कारण — अनैसर्गिक संबंधाचा वाद?
तपासादरम्यान, आरोपी रमेश सत्रे व मृत इसम यांच्यात अनैसर्गिक संबंधांवरून काही दिवसांपासून वाद चालू होते, अशी माहिती प्राथमिक चौकशीत समोर आली आहे. या वादातूनच दोघांमध्ये बाचाबाची होऊन रागाच्या भरात खून केल्याचा पोलिसांचा संशय आहे.
या अधिकाऱ्यांच्या मार्गदर्शनाखाली यशस्वी कारवाई:
ही कामगिरी अपर पोलीस आयुक्त (गुन्हे) संजय देशमुख, पोलीस उप-आयुक्त निखील पिंगळे, सहा. आयुक्त गणेश इंगळे यांच्या मार्गदर्शनाखाली, वरिष्ठ पोलीस निरीक्षक शब्बीर सय्यद व त्यांच्या युनिट ०१ च्या चमूने केली. या पथकात अभिजीत पाटील, कृष्णा बाबर, अनिकेत बाबर, शशिकांत दरेकर, निलेश जाधव, अभिनव लडकत, अमित जमदाडे, निलेश साबळे, शुभम देसाई यांचा समावेश होता.
