पुणे – वाघोली परिसरात नागरिकांच्या गळ्यातील साखळ्या खेचून पळणाऱ्या सराईत गुन्हेगार टोळीला वाघोली पोलिसांनी अचूक माहिती आणि तांत्रिक विश्लेषणाच्या आधारे अटक करून मोठं यश मिळवलं आहे. या कारवाईत एकूण ५ आरोपींना अटक करण्यात आली असून, त्यांच्याकडून सुमारे १ लाख ८९ हजार रुपयांचा मुद्देमाल, ज्यामध्ये सोने, मोबाईल फोन आणि दुचाकीचा समावेश आहे, तो जप्त करण्यात आला आहे.
गुन्हेगारी टोळीचा पर्दाफाश:
ही कारवाई वाघोली पोलिस ठाण्याचे वरिष्ठ पोलीस निरीक्षक श्री. युवराज हांडे यांच्या मार्गदर्शनाखाली करण्यात आली असून, तपास पथकातील पोलीस अंमलदार साईनाथ रोकडे व दिपक कोकरे यांच्या गोपनीय माहिती व सतर्कतेमुळे हे गुन्हे उघडकीस आले.
मुख्य आरोपी प्रशांत संतविजय यादव (वय १९, रा. सातपूर, नाशिक) याच्या चौकशीतून समोर आलं की, त्याने आपल्या साथीदार कुणाल विश्वनाथ साबळे (वय २१) याच्या मदतीने दौंड येथून एक दुचाकी चोरली आणि त्यावरून वाघोली परिसरात साखळी चोरी केली. त्यानंतर, ताजिम अन्सारी नावाच्या दुसऱ्या साथीदाराच्या मदतीने त्यांनी कोरेगाव पार्क व विमाननगर परिसरात साखळी चोरीच्या आणखी घटना घडवल्या.
नाशिक शहरातील गुन्ह्यांशी संबंध:
यातील आरोपी ताजिम सल्लाउद्दीन अन्सारी याच्यावर नाशिक शहरातील गंगापूर, म्हसरूळ आणि सातपूर पोलीस ठाण्यांमध्ये एकूण ३ गंभीर गुन्हे दाखल आहेत. याशिवाय, आरोपींकडून चोरलेला सोन्याचा ऐवज त्यांनी त्यांच्या इतर साथीदारांकडे सुपूर्द केला होता – संजोग संतोष भांगरे (वय १८) आणि मनोज उदय पाटील (वय ३१), दोघेही नाशिकचे रहिवासी आहेत.
पोलिसांचा अचूक तपास आणि कार्यवाही:
ही संपूर्ण कारवाई मा. अपर पोलीस आयुक्त श्री. मनोज पाटील, पोलीस उप आयुक्त श्री. हिम्मत जाधव, सहा. पोलीस आयुक्त श्रीमती प्रांजली सोनवणे, तसेच वाघोली पोलिस ठाण्याचे वरिष्ठ निरीक्षक युवराज हांडे यांच्या मार्गदर्शनाखाली पार पडली. तपास पथकात पो.उ.नि. मनोज बागल आणि त्यांचे सहकारी पोलीस अंमलदारांनी महत्त्वाची भूमिका बजावली.
नागरिकांतून कौतुकाची लाट:
या धडाकेबाज कारवाईमुळे पुणे शहरात गुन्हेगारीला आळा बसण्यास मदत झाली असून, नागरिकांमध्ये पोलिसांच्या कार्यक्षमतेबद्दल समाधान व्यक्त होत आहे. वाघोली, विमाननगर व कोरेगाव पार्क परिसरात महिला व नागरिकांमध्ये जो भीतीचा वातावरण होतं, त्यात दिलासा मिळाला आहे.
उघडकीस आलेले गुन्हे:
-
वाघोली पो.स्टे. गु.र.नं. 219/2025
-
विमानतळ पो.स्टे. गु.र.नं. 246/2025
-
कोरेगाव पार्क पो.स्टे. गु.र.नं. 51/2025
-
दौंड पो.स्टे. गु.र.नं. 369/2025
-
गंगापूर पो.स्टे. गु.र.नं. 113/2025
-
म्हसरूळ पो.स्टे. गु.र.नं. 102/2025
-
सातपूर पो.स्टे. गु.र.नं. 101/2025
