मुंबई: राज्यातील पालकमंत्र्यांची नवीन यादी जाहीर करण्यात आली असून, या यादीत मोठे बदल करण्यात आले आहेत. बीड जिल्ह्याच्या पालकमंत्रिपदावरून धनंजय मुंडेंना डच्चू देत उपमुख्यमंत्री अजित पवार यांची नियुक्ती करण्यात आली आहे. यामुळे धनंजय मुंडेंना मोठा धक्का बसला आहे. राज्यातील ३६ जिल्ह्यांतील पालकमंत्री नियुक्तीबाबत ही यादी महत्त्वाची मानली जात आहे.
अजित पवारांकडे पुणे आणि बीडचा कारभार
उपमुख्यमंत्री अजित पवार यांच्याकडे पुणे आणि बीड या दोन महत्त्वाच्या जिल्ह्यांचे पालकमंत्रिपद देण्यात आले आहे. याआधी धनंजय मुंडे यांच्याकडे बीडचे पालकमंत्रिपद होते, परंतु बीडमधील काही वादग्रस्त घटनांमुळे त्यांच्यावर टीका होत होती. त्याच पार्श्वभूमीवर त्यांना या पदावरून वगळण्यात आले आहे.
धनंजय मुंडेंना डच्चू कसा बसला?
धनंजय मुंडेंविरोधात विरोधकांनी अनेकदा आक्रमक भूमिका घेतली होती. बीड जिल्ह्यातील काही वादग्रस्त प्रकरणे आणि हत्येच्या तपासावरून त्यांच्यावर राजीनाम्याची मागणी होत होती. त्यामुळेच बीडच्या पालकमंत्रिपदासाठी त्यांना डावलण्यात आले आहे.
मुख्यमंत्र्यांकडे गडचिरोली तर एकनाथ शिंदेंकडे मुंबई आणि ठाणे
मुख्यमंत्री देवेंद्र फडणवीस यांना गडचिरोली जिल्ह्याचे पालकमंत्री म्हणून जबाबदारी देण्यात आली आहे. तसेच उपमुख्यमंत्री एकनाथ शिंदे यांच्याकडे मुंबई शहर आणि ठाणे जिल्ह्याचा पालकमंत्रिपदाचा कार्यभार आहे. ही नियुक्ती मुंबई आणि ठाण्यातील विकासकामांना गती देण्यासाठी महत्त्वाची ठरेल, अशी चर्चा आहे.
महिला मंत्र्यांनाही महत्त्वाची जबाबदारी
अदिती तटकरे या रायगड जिल्ह्याच्या पालकमंत्री म्हणून नियुक्त झाल्या आहेत, तर पंकजा मुंडेंना जालन्याचे पालकमंत्रिपद देण्यात आले आहे. महिलांना दिल्या गेलेल्या या जबाबदाऱ्या महिला नेतृत्वासाठी सकारात्मक बदलाचे चिन्ह मानल्या जात आहेत.
राजकीय वर्तुळात चर्चा आणि प्रतिक्रिया
या यादीने राजकीय वर्तुळात जोरदार चर्चा रंगली आहे. विरोधकांनी काही नेत्यांना दिल्या गेलेल्या जबाबदाऱ्यांवर टीका केली असून, काही नेत्यांनी याला योग्य न्याय दिला असल्याचे मत व्यक्त केले आहे. धनंजय मुंडेंना वगळण्यामागचे कारण स्पष्ट झाले नसले तरी विरोधकांनी या मुद्द्यावर सरकारला प्रश्न विचारण्याची तयारी सुरू केली आहे.
पालकमंत्र्यांची संपूर्ण यादी
गडचिरोली – देवेंद्र फडणवीस नागपूर – चंद्रशेखर बावनकुळे ठाणे – एकनाथ शिंदे पुणे – अजित पवार बीड – अजित पवार सिंधुदुर्ग- नितेश राणे अमरावती – चंद्रशेखर बावनकुळे अहिल्यानगर – राधाकृष्ण विखे पाटील वाशिम – हसन मुश्रीफ सांगली – चंद्रकांत पाटील सातारा -शंभुराजे देसाई छत्रपती संभाजी नगर – संजय शिरसाट जळगाव – गुलाबराव पाटील यवतमाळ – संजय राठोड कोल्हापूर – प्रकाश आबिटकर, सह पालकमंत्री माधुरी मिसाळ अकोला – आकाश फुंडकर भंडारा – संजय सावकारे बुलढाणा – मकरंद जाधव चंद्रपूर – अशोक ऊईके धाराशीव – प्रताप सरनाईक धुळे – जयकुमार रावल गोंदिया – बाबासाहेब पाटील हिंगोली – नरहरी झिरवळ लातूर – शिवेंद्रसिंग भोसले मुंबई शहर – एकनाथ शिंदे मुंबई उपनगर -आशिष शेलार/ सह पालकमंत्री मंगलप्रभात लोढा नांदेड – अतुल सावे नंदुरबार – माणिकराव कोकाटे नाशिक – गिरीष महाजन पालघर – गणेश नाईक परभणी – मेघना बोर्डीकर रायगड – अदिती तटकरे सिंधुदुर्ग- नितेश राणे रत्नागिरी – उदय सामंत सोलापूर – जयकुमार गोरे वर्धा – पंकज भोयर जालना – पंकजा मुंडे.
