लोणावळा: लोणावळा उपविभागाचे सहायक पोलीस अधीक्षक सत्यसाई कार्तिक यांनी दारू व खाद्यपदार्थ विक्रीच्या नियमांचे उल्लंघन करणाऱ्या बार चालकांवर कारवाई करत दमदार एन्ट्री केली आहे. मावळातील दीपा बार अँड रेस्टॉरंट (कामशेत) आणि फ्लेवर्स बार अँड रेस्टॉरंट (वडगाव मावळ) या दोन ठिकाणी रात्री उशिरापर्यंत सुरू असलेल्या ऑर्केस्ट्रा आणि अवैध व्यवहारांवर छापा टाकून बार चालकांवर गुन्हे दाखल करण्यात आले आहेत.
घटनाक्रम:
दिनांक १० जानेवारी २०२५ रोजी मध्यरात्री लोणावळा उपविभागाचे सहा. पोलीस अधीक्षक सत्यसाई कार्तिक यांनी त्यांच्या पथकासह धाड टाकली. या कारवाईत दोन बार चालक विहित वेळेच्या पुढे बार चालवत होते. ग्राहकांना अन्नपदार्थ, मद्य विक्री आणि वाद्य संगीत (ऑर्केस्ट्रा) चालू ठेवणे, या सर्व गोष्टींमध्ये नियमांचे उल्लंघन केले जात असल्याचे आढळून आले.
कायद्याचा वापर:
वरील प्रकारामुळे भारतीय न्याय संहिता कलम २२३ आणि महाराष्ट्र पोलीस अधिनियम कलम ३३(डब्ल्यू) अन्वये कामशेत पोलीस स्टेशन आणि वडगाव मावळ पोलीस स्टेशन येथे गुन्हे नोंदवले गेले आहेत.
पोलीस अधिकाऱ्यांचे वक्तव्य:
ही कारवाई पुणे ग्रामीण पोलीस अधीक्षक पंकज देशमुख आणि अपर पोलीस अधीक्षक रमेश चोपडे यांच्या मार्गदर्शनाखाली करण्यात आली. सहायक पोलीस अधीक्षक सत्यसाई कार्तिक यांनी स्पष्ट केले की, “नियमांचे उल्लंघन करणाऱ्यांवर कठोर कारवाई केली जाईल आणि कायदा सुव्यवस्थेची गालबोट लागू दिली जाणार नाही.”
पोलीस पथकातील योगदान:
कारवाईमध्ये सहाय्यक पोलीस अधीक्षक सत्यसाई कार्तिक यांच्या नेतृत्वाखालील पथकाने या दोन ठिकाणी यशस्वी छापे टाकून बारमधील नियमबाह्य व्यवहारांना लगाम घातला आहे.
