पुणे: पुणे मेट्रोच्या वनाज ते रामवाडी मार्गावरील येरवडा मेट्रो स्टेशनचे व्यावसायिक संचालन बुधवारी सुरू होत आहे. या स्टेशनची वास्तू ऐतिहासिक दांडी मार्चने प्रेरित असून, ती भारताच्या स्वातंत्र्य चळवळीतील एक महत्त्वपूर्ण अध्यायाचे प्रतीक आहे. हे स्टेशन केवळ एक महत्त्वपूर्ण परिवहन दुवा म्हणून काम करणार नाही, तर आपल्या समृद्ध वारशाची आठवण करून देईल.
आता वनाज ते रामवाडी मार्ग पूर्णपणे कार्यान्वित होणार असून, येरवडाला पुणे आणि पिंपरी-चिंचवड शहरातील मेट्रो नेटवर्कशी जोडणार आहे. त्यामुळे येरवडाच्या विद्यार्थ्यांना, व्यावसायिकांना आणि रहिवाशांना, तसेच शाळा, महाविद्यालये आणि आयटी हबला जाणाऱ्या प्रवाशांना मोठा फायदा होणार आहे.
महामेट्रोचे व्यवस्थापकीय संचालक श्रवण हार्डीकर म्हणाले, “पुणे आणि पिंपरी-चिंचवड शहरातील नागरिकांना प्रभावी आणि सोयीस्कर सार्वजनिक वाहतूक सेवा देण्याच्या आमच्या प्रवासात येरवडा मेट्रो स्टेशनचे उद्घाटन हा एक महत्त्वाचा टप्पा आहे.”
येरवडा स्टेशनचे काम सुरू असतानाच इतर मार्गावरील मेट्रो सेवा सुरू झाली होती, परंतु आता संपूर्ण वनाज-रामवाडी मार्ग कार्यान्वित होणार आहे. पिंपरी-चिंचवड ते स्वारगेट मार्ग पुढील महिन्यापासून पूर्णपणे कार्यान्वित होण्याची शक्यता आहे, कारण सिव्हिल कोर्ट स्टेशन ते स्वारगेटपर्यंतच्या भूमिगत मेट्रो सेवेसाठीचे काम अंतिम टप्प्यात आहे. दरम्यान, पुणे मेट्रो रेल्वे पिंपरी-चिंचवडपासून निगडीपर्यंत आणि कात्रज ते स्वारगेटपर्यंत मेट्रो मार्गाचा विस्तार करत आहे.
