पुणे, दि. २६ फेब्रुवारी २०२६ : Pune Police यांच्या गुन्हे शाखेतील खंडणी विरोधी पथक–१ ने सराईत गुन्हेगाराकडून गावठी पिस्टल आणि जिवंत काडतूस जप्त करत मोठी कारवाई केली आहे. विना परवाना शस्त्र बाळगणाऱ्या आरोपीविरुद्ध आर्म अॅक्टअंतर्गत गुन्हा दाखल करण्यात आला आहे.
गुप्त माहितीवरून कारवाई
खंडणी विरोधी पथक–१ चे अधिकारी व कर्मचारी पुणे शहरात रेकॉर्डवरील फरारी व तडीपार आरोपींचा शोध घेत पेट्रोलिंग करत होते. त्यावेळी पोलीस अंमलदार सचिन माळवे व दयानंद तेलंगे यांना गुप्त बातमीदारामार्फत माहिती मिळाली की, भारती विद्यापीठ पोलीस ठाण्याच्या रेकॉर्डवरील आरोपी संकेत चोरघे याच्याकडे पिस्टल आहे.
आरोपी संकेत गोरख चोरघे (वय २३) हा आंबेगाव पठार परिसरात राहत असून सिंहगड कॉलेज परिसरात त्याची वर्दळ असल्याचे समजले. दि. २४ फेब्रुवारी रोजी तो सिंहगड कॉलेज कॅम्पसमध्ये आल्याची माहिती मिळताच पथक घटनास्थळी दाखल झाले; मात्र तो दुचाकीवरून पसार झाला.
रात्रभर सापळा, अखेर अटक
पथकाने हार न मानता आंबेगाव पठार येथील त्याच्या राहत्या घरी रात्रभर सापळा रचला. दि. २५ फेब्रुवारी रोजी सर्वे नं. १६/१, साई सिद्धी अपार्टमेंट, दत्त मंदिराशेजारी, आंबेगाव पठार येथून त्याला ताब्यात घेण्यात आले. झडतीदरम्यान त्याच्याकडून एक गावठी पिस्टल, त्याचे मॅगझिन आणि एक जिवंत काडतूस असा एकूण ३५,२०० रुपयांचा मुद्देमाल जप्त करण्यात आला.
याप्रकरणी Bharati Vidyapeeth Police Station येथे गुन्हा रजिस्टर क्रमांक ७२/२०२६ अन्वये आर्म अॅक्ट कलम ३(२५) तसेच महाराष्ट्र पोलीस कायदा कलम ३७(१)(३) सह १३५ प्रमाणे गुन्हा नोंद करण्यात आला आहे. पुढील तपास संबंधित पोलीस ठाण्याकडून सुरू आहे.
वरिष्ठांचे मार्गदर्शन
ही कारवाई अपर पोलीस आयुक्त (गुन्हे) पंकज देशमुख, पोलीस उपायुक्त (गुन्हे) निखिल पिंगळे आणि सहाय्यक पोलीस आयुक्त (गुन्हे शाखा) शंकर खटके यांच्या मार्गदर्शनाखाली करण्यात आली. पोलीस निरीक्षक विश्वजीत काइंगडे यांच्या सूचनेनुसार पथकातील अधिकाऱ्यांनी समन्वयाने काम करत आरोपीला अटक केली.
गुन्हेगारीवर लगाम
पुणे शहरात अवैध शस्त्र बाळगणाऱ्या गुन्हेगारांविरोधात कठोर कारवाई सुरू असून अशा प्रकारे गुन्हेगारीवर अंकुश ठेवण्यासाठी नियमित गस्त आणि गुप्त माहितीच्या आधारे मोहीम राबवली जात आहे, असे पोलिसांनी स्पष्ट केले.
