पिंपरी-चिंचवड : Pimpri-Chinchwad शहरातील मोशी परिसरात सोमवारी उशिरा रात्री भीषण ‘हिट अँड रन’ची घटना घडली. मद्यधुंद अवस्थेत कंटेनर चालवणाऱ्या चालकाने बेफाम वेगात वाहन चालवत सात ते आठ चारचाकी वाहनांना जोरदार धडक दिली. या अपघातात अनेक वाहनांचे मोठे नुकसान झाले असून काही नागरिक जखमी झाले आहेत. सुदैवाने जीवितहानी टळली असली तरी परिसरात भीतीचे वातावरण निर्माण झाले.
ही घटना रात्री सुमारे साडेअकराच्या सुमारास मोशीतील बोऱ्हाडेवाडी, राजमाता जिजाऊ चौक आणि हॉटेल सिल्वर ब्लू परिसरात घडली. प्राथमिक माहितीनुसार, संबंधित कंटेनर चाकण-हायवे रोडवरून मोशी भाजी मंडई चौक मार्गे टाटा मोटर्सच्या दिशेने जात होता. चालक मद्याच्या नशेत असल्याची माहिती समोर आली असून त्याने वाहनावरील नियंत्रण गमावले होते.
बोऱ्हाडेवाडी परिसरात पोहोचताच कंटेनरचा वेग वाढला आणि समोरून येणाऱ्या वाहनांना एकामागून एक धडक बसली. रस्त्याच्या कडेला उभ्या असलेल्या कार, एसयूव्ही आणि दुचाकींनाही जोरदार फटका बसला. काही वाहनांचे अक्षरशः चक्काचूर झाले असून लाखो रुपयांचे नुकसान झाल्याचा अंदाज आहे. प्रत्यक्षदर्शींनी सांगितले की, कंटेनरसमोर येणारे प्रत्येक वाहन उडवत तो पुढे सरकत होता आणि काही अंतरानंतरच वाहन थांबवण्यात आले.
अपघातानंतर स्थानिक नागरिकांनी तात्काळ घटनास्थळी धाव घेतली. जखमींना बाहेर काढून रुग्णालयात हलवण्यात मदत केली. काही जखमींना किरकोळ दुखापत झाली असून त्यांच्यावर उपचार सुरू आहेत. घटनेमुळे काही काळ वाहतूक ठप्प झाली होती.
घटनेची माहिती मिळताच Bhosari MIDC Police Station येथील पोलिसांनी घटनास्थळी धाव घेत परिस्थिती नियंत्रणात आणली. कंटेनर चालकाला ताब्यात घेण्यात आले असून त्याची वैद्यकीय तपासणी करण्यात येत आहे. रक्तातील अल्कोहोलचे प्रमाण तपासल्यानंतर त्याच्यावर गुन्हा दाखल करण्यात येणार असल्याचे पोलिसांनी सांगितले.
या घटनेनंतर मोशी परिसरात संतापाची लाट उसळली आहे. मद्यधुंद वाहनचालकांवर कठोर कारवाई करण्याची मागणी स्थानिक नागरिकांकडून करण्यात येत आहे. शहरात वाढत्या बेदरकार वाहनचालकांमुळे नागरिकांच्या सुरक्षिततेचा प्रश्न ऐरणीवर आला आहे. पोलिस प्रशासनाने रात्रीच्या वेळी विशेष तपासणी मोहीम राबवण्याचे संकेत दिले आहेत.
