परिमंडळ ६ कडून मोठी कारवाई; ३ सराईत गुन्हेगारांना दोन वर्षांसाठी तडीपार

पुणे : Maharashtra Police अंतर्गत Pune City Police च्या परिमंडळ ६ कार्यालयाकडून गुन्हेगारीवर आळा घालण्यासाठी कठोर पाऊल उचलण्यात आले आहे. महाराष्ट्र पोलीस अधिनियम १९५१ च्या कलम ५६ अन्वये एकूण तीन सराईत गुन्हेगारांना पुणे शहर, पिंपरी-चिंचवड शहर व पुणे ग्रामीण जिल्हा हद्दीतून दोन वर्षांच्या कालावधीसाठी तडीपार करण्यात आले आहे.

पोलीस उप आयुक्त परिमंडळ ६ डॉ. राजकुमार शिंदे (भा.पो.से.) यांच्या आदेशानुसार ही कारवाई करण्यात आली. आगामी सण-उत्सवांच्या पार्श्वभूमीवर कायदा व सुव्यवस्था अबाधित राखण्यासाठी तसेच गुन्हेगारी प्रवृत्तीला प्रतिबंध करण्यासाठी ही ठोस कारवाई करण्यात आल्याचे प्रशासनाकडून सांगण्यात आले.

तडीपार करण्यात आलेले आरोपी :

1. गणेश परमेश्वर जाधव (वय २३, रा. मुंढवा, पुणे)
   याच्यावर बेकायदेशीर जमाव जमवणे, खाजगी मालमत्तेचे नुकसान करणे, धमकावणे, बेकायदेशीर शस्त्र बाळगून दहशत निर्माण करणे व दुखापत करणे असे गंभीर गुन्हे दाखल आहेत.

2. आकाश उर्फ अक्षय संतोष भाले (वय २१, रा. लोणी काळभोर, ता. हवेली, जि. पुणे)
   घातक शस्त्राने दुखापत करणे, जिवे मारण्याची धमकी देणे, बेकायदेशीर शस्त्र बाळगणे तसेच अमली पदार्थ विक्रीसारख्या गंभीर गुन्ह्यांमध्ये सहभाग.

3. अभिषेक उर्फ नयन हरिदास भोसले (वय १९, रा. शेवाळवाडी, ता. हवेली, जि. पुणे)
   जबरी चोरी, मारहाण, खाजगी मालमत्तेचे नुकसान, बेकायदेशीर शस्त्रांच्या साहाय्याने दहशत निर्माण करणे अशा अनेक गुन्ह्यांमध्ये सहभाग.

पोलीस नोंदीप्रमाणे हे सर्व आरोपी रेकॉर्डवरील सराईत गुन्हेगार असून त्यांच्या हालचालींवर पोलिसांचे बारकाईने लक्ष होते. गुन्हेगारीला आळा घालण्यासाठी व सामान्य नागरिकांमध्ये सुरक्षिततेची भावना निर्माण करण्यासाठी ही प्रतिबंधात्मक कारवाई करण्यात आली आहे.

तडीपार कालावधीत संबंधित आरोपी पुणे शहर पोलीस आयुक्तालय, पिंपरी-चिंचवड पोलीस आयुक्तालय किंवा पुणे जिल्हा हद्दीत आढळल्यास त्यांच्या विरोधात कठोर कायदेशीर कारवाई करण्यात येणार आहे. नागरिकांनी अशा व्यक्ती दिसल्यास तात्काळ पोलीस नियंत्रण कक्ष (१००/११२) किंवा संबंधित पोलीस ठाण्याशी संपर्क साधावा, असे आवाहन करण्यात आले आहे.

परिमंडळ ६ कार्यक्षेत्रात गुन्हेगारीविरुद्ध ‘झिरो टॉलरन्स’ धोरण राबविले जात असून, पुढील काळात मोका, एमपीडीए व तडीपार कारवायांची प्रक्रिया आणखी वेगाने राबविण्यात येणार असल्याचेही स्पष्ट करण्यात आले आहे.