राष्ट्रवादी काँग्रेस पार्टीचे नाशिक जिल्हाध्यक्ष ॲड. रवींद्र पगार यांच्या आकस्मिक निधनामुळे जिल्ह्यात हळहळ व्यक्त होत आहे. अल्पशा आजाराने त्यांचे निधन झाल्याची बातमी समोर येताच कार्यकर्ते, सहकारी आणि नागरिकांमध्ये शोककळा पसरली. आज त्यांच्या मूळगावी बागलाण तालुक्यातील उत्राणे येथे अत्यंत शोकाकुल वातावरणात अंत्यसंस्कार पार पडले. गावात सर्वत्र शांतता आणि हळहळ दिसून येत होती.
सकाळपासूनच त्यांच्या निवासस्थानी आणि अंत्यसंस्कारस्थळी नागरिकांची मोठी गर्दी जमली होती. हजारो कार्यकर्ते आणि ग्रामस्थांनी रांगेत उभे राहून त्यांच्या पार्थिवाचे अंत्यदर्शन घेतले. ‘पगार साहेब अमर राहो’ अशा घोषणांनी परिसर दुमदुमला होता. अनेकांच्या डोळ्यांत अश्रू होते. आपल्या साध्या, मनमिळावू स्वभावामुळे आणि सर्वसामान्यांच्या प्रश्नांसाठी सतत धावून जाणाऱ्या नेतृत्वामुळे ते जनतेच्या मनात घर करून होते.
रवींद्र पगार यांनी वकिली व्यवसायासोबतच सामाजिक आणि राजकीय क्षेत्रात सक्रिय काम केले. जिल्हाध्यक्ष म्हणून त्यांनी पक्ष संघटन मजबूत करण्यासाठी गावागावांत संपर्क वाढवला. शेतकरी, कामगार, युवक आणि वंचित घटकांच्या समस्या सोडवण्यासाठी ते सातत्याने पुढाकार घेत होते. त्यांच्या नेतृत्वाखाली अनेक विकासकामांना गती मिळाली होती. त्यामुळे त्यांचे जाणे पक्षासाठी आणि जिल्ह्यासाठी मोठी पोकळी निर्माण करणारे ठरले आहे.
अंत्यसंस्कारावेळी मंत्री नरहरी झिरवाळ, आमदार दिलीप बनकर, आमदार दिलीप बोरसे, माजी आमदार संजय चव्हाण, प्रदेश सरचिटणीस दिलीप खैरे, शहराध्यक्ष रंजन ठाकरे, माजी नगराध्यक्ष सुनील मोरे, येवला विधानसभा अध्यक्ष वसंत पवार, माजी जिल्हा परिषद सभापती संजय बनकर, डॉ. योगेश गोसावी, प्रा. ज्ञानेश्वर दराडे, दिपक लोणारी, समाधान जेजुरकर, प्रसाद सोनवणे यांच्यासह विविध क्षेत्रातील मान्यवर उपस्थित होते. सर्वांनी त्यांच्या कुटुंबीयांचे सांत्वन करत पगार यांच्या कार्याची आठवण करून दिली.
यावेळी उपस्थित मान्यवरांनी आपल्या भावना व्यक्त करताना सांगितले की, “रवींद्र पगार हे केवळ राजकीय नेते नव्हते, तर सर्वसामान्यांचा आधारवड होते. त्यांच्या जाण्याने समाजाने एक संवेदनशील आणि प्रामाणिक नेता गमावला आहे.” गावकऱ्यांनीही त्यांच्या सामाजिक कार्याची आठवण सांगत भावनिक श्रद्धांजली वाहिली.
पगार यांच्या पश्चात कुटुंबीयांवर दुःखाचा डोंगर कोसळला असून सर्व स्तरातून त्यांना धीर दिला जात आहे. त्यांच्या आठवणी आणि कार्यातूनच पुढील पिढ्यांना प्रेरणा मिळेल, अशी भावना व्यक्त होत आहे.
