बीड : श्री क्षेत्र गहिनीनाथ गड, बीड येथे आयोजित करण्यात आलेल्या श्री संत वामनभाऊ महाराजांच्या ५०व्या पुण्यतिथी सोहळ्याला मुख्यमंत्री देवेंद्र फडणवीस यांनी प्रमुख उपस्थिती लावून या आध्यात्मिक महापर्वाला गौरव प्राप्त करून दिला. संत परंपरेचा वारसा जपत आयोजित करण्यात आलेल्या या सोहळ्याला राज्यभरातून भाविकांनी मोठ्या संख्येने हजेरी लावली.
या पवित्र प्रसंगी मंत्री पंकजा मुंडे, आमदार सुरेश धस, आमदार मोनिका राजले, श्री क्षेत्र गहिनीनाथ गडचे महंत ह.भ.प. विठ्ठल महाराज यांच्यासह अनेक मान्यवर, संत-महंत, वारकरी, तसेच भक्तगण उपस्थित होते. संपूर्ण परिसर भक्तीमय वातावरणाने भारावून गेला होता.
मुख्यमंत्री देवेंद्र फडणवीस यांनी यावेळी संत वामनभाऊ महाराजांच्या कार्याचा गौरव करत त्यांच्या विचारांची आजच्या समाजाला अधिक गरज असल्याचे प्रतिपादन केले. “संतांनी दिलेले समतेचे, करुणेचे आणि समाजप्रबोधनाचे विचारच समाजाला योग्य दिशा देतात. संत वामनभाऊ महाराजांचे कार्य हे केवळ धार्मिक नसून सामाजिक परिवर्तनाचेही प्रेरणास्थान आहे,” असे त्यांनी सांगितले.
कार्यक्रमात कीर्तन, प्रवचन, अभंगगायन व सांस्कृतिक कार्यक्रमांनी भाविकांचे मन जिंकले. वारकरी संप्रदायाच्या परंपरेनुसार भक्तांनी मोठ्या श्रद्धेने दर्शन घेतले. या सोहळ्यामुळे संपूर्ण गहिनीनाथ गड परिसर भक्ती, श्रद्धा आणि अध्यात्माने न्हाऊन निघाला. हा सोहळा केवळ धार्मिक कार्यक्रम न राहता, समाजाला एकत्र बांधणारा आणि संत परंपरेचा गौरव करणारा भव्य आध्यात्मिक महोत्सव ठरला.
