मुंबई : आगामी बृहन्मुंबई महानगरपालिका निवडणूक २०२६ च्या पार्श्वभूमीवर शिवसेनेने प्रचाराची रणधुमाळी सुरू केली असून, याच अनुषंगाने महाराष्ट्राचे उपमुख्यमंत्री तथा शिवसेना नेते मा.ना.श्री. एकनाथ शिंदे यांनी बुधवारी मुंबईत भव्य रोड शो काढला. या रोड शोला पक्षाचे पदाधिकारी, कार्यकर्ते आणि स्थानिक नागरिकांनी उत्स्फूर्त प्रतिसाद देत मोठ्या संख्येने उपस्थिती लावली.
हा रोड शो मध्य मुंबईतील प्रमुख भागांतून मार्गक्रमण करत पार पडला. ठिकठिकाणी नागरिकांनी पुष्पवृष्टी, घोषणाबाजी आणि हातात पक्षाचे झेंडे घेऊन उपमुख्यमंत्री एकनाथ शिंदेंचे स्वागत केले. संपूर्ण परिसर शिवसेनेच्या घोषणांनी दुमदुमून गेला होता. रोड शोदरम्यान मुंबईकरांशी थेट संवाद साधत त्यांनी पक्षाची भूमिका आणि आगामी विकासाचा आराखडा मांडला.
यावेळी बोलताना उपमुख्यमंत्री एकनाथ शिंदे म्हणाले की, मुंबईकरांना दर्जेदार मूलभूत सुविधा, स्वच्छ पाणीपुरवठा, चांगले रस्ते, सक्षम ड्रेनेज व्यवस्था, आरोग्य सेवा आणि सुरक्षित वातावरण देणे ही शिवसेनेची प्राथमिकता आहे. “मुंबई हे देशाची आर्थिक राजधानी आहे. त्यामुळे येथे राहणाऱ्या प्रत्येक नागरिकाचे जीवनमान उंचावण्यासाठी शिवसेना कटिबद्ध आहे,” असे त्यांनी स्पष्ट केले.
शिंदे यांनी पुढे सांगितले की, राज्य सरकारच्या सहकार्याने मुंबईत पायाभूत सुविधा, सार्वजनिक वाहतूक, पुनर्विकास प्रकल्प आणि झोपडपट्टी पुनर्वसनास गती देण्यात येणार आहे. ‘मुंबईकरांच्या प्रश्नांसाठी शिवसेना रस्त्यावर उतरते आणि कामातून उत्तर देते’ हा पक्षाचा इतिहास असल्याचेही त्यांनी अधोरेखित केले.
या रोड शोमुळे शिवसेनेच्या कार्यकर्त्यांमध्ये नवचैतन्य संचारले असून, बीएमसी निवडणूक २०२६साठी प्रचाराला वेग मिळाल्याचे चित्र दिसून येत आहे. येत्या काळात मुंबईच्या विविध भागांत अशाच प्रकारचे जनसंपर्क उपक्रम राबवले जाणार असल्याचे संकेत पक्षाने दिले आहेत.
