टिपू पठाण टोळीला मोठा धक्का; मोका गुन्ह्यातील दोन फरारी आरोपी पुणे गुन्हे शाखेकडून अटक

पुणे शहरातील कुख्यात टिपू पठाण टोळीविरोधात पुणे पोलिसांच्या गुन्हे शाखेने मोठी कारवाई करत मोका (महाराष्ट्र संघटित गुन्हेगारी नियंत्रण अधिनियम) अंतर्गत पाहिजे असलेल्या दोन फरारी आरोपींना जेरबंद केले आहे. ही कारवाई गुन्हे शाखा युनिट-५, पुणे शहर यांनी दिनांक २१ डिसेंबर २०२५ रोजी केली आहे.

पुणे शहर पोलीस आयुक्तालयाच्या आदेशानुसार शहरातील पोलीस स्टेशनच्या अभिलेखांवर नमूद असलेल्या फरारी व पाहिजे आरोपींचा शोध घेण्यासाठी विशेष मोहीम राबविण्यात येत होती. त्याच अनुषंगाने गुन्हे शाखा युनिट-५ चे पथक सक्रियपणे काम करत होते.

काळेपडळ पोलीस स्टेशन गुन्हा रजिस्टर नंबर ४०४/२०२५ अंतर्गत गंभीर स्वरूपाचे गुन्हे दाखल असून, भारतीय न्याय संहिता तसेच महाराष्ट्र संघटित गुन्हेगारी नियंत्रण अधिनियम १९९९ (मोका) अंतर्गत कलम ३(१)(ii), ३(२) व ३(४) लागू आहेत. या गुन्ह्यातील पाहिजे आरोपी

1. साजीद झिब्राइल नदाफ (वय २७, रा. वेताळबाबा वसाहत, हडपसर)

2. इरफान नासीर शेख (वय २७, रा. सय्यदनगर, हडपसर)
   हे परराज्यातून पुण्यात येणार असल्याची गोपनीय माहिती पोलिसांना मिळाली होती.

ही माहिती पोलीस अंमलदार गणेश माने, नासेर देशमुख व परमेश्वर कदम यांना प्राप्त होताच, वरिष्ठ अधिकाऱ्यांच्या मार्गदर्शनाखाली सापळा रचण्यात आला. त्यानुसार आरोपी साजीद नदाफ यास वेताळबाबा वसाहत मंदिराजवळून, तर आरोपी इरफान शेख यास सय्यदनगर, आयशा मस्जिद शेजारील रस्त्यावरून कायदेशीर प्रक्रिया पूर्ण करून ताब्यात घेण्यात आले.

ही संपूर्ण कारवाई मा. अपर पोलीस आयुक्त (गुन्हे) श्री. पंकज देशमुख, मा. पोलीस उप आयुक्त (गुन्हे) श्री. निखिल पिंगळे आणि मा. सहायक पोलीस आयुक्त (गुन्हे-२) श्री. राजेंद्र मुळीक यांच्या सूचनांनुसार पार पडली.
पोलीस निरीक्षक छगन कापसे यांच्या नेतृत्वाखाली पोलीस उपनिरीक्षक अभिजीत पवार व त्यांच्या पथकाने ही यशस्वी कामगिरी केली.

या कारवाईमुळे पुणे शहरात संघटित गुन्हेगारीविरोधात पोलिसांची धडक कारवाई पुन्हा एकदा अधोरेखित झाली असून, शहरातील कायदा व सुव्यवस्था अबाधित ठेवण्यासाठी पोलीस प्रशासन सज्ज असल्याचा ठाम संदेश दिला आहे.