सांगली | प्रतिनिधी – सांगली-मिरज-कुपवाड महानगरपालिकेच्या आगामी सार्वत्रिक निवडणुकीच्या पार्श्वभूमीवर राष्ट्रवादी काँग्रेस पक्षाच्या वतीने भव्य कार्यकर्ता मेळावा व पक्षप्रवेश सोहळ्याचे आयोजन करण्यात आले होते. या मेळाव्यास उपस्थित राहून पदाधिकारी, कार्यकर्ते आणि नागरिकांना संबोधित करण्यात आले. संपूर्ण कार्यक्रमात उत्साह, नवचैतन्य आणि संघटनात्मक बळाचे दर्शन घडले.
या मेळाव्याच्या निमित्ताने माजी महापौर श्री. मैनुद्दीन बागवान, माजी महापौर श्री. आनंदा देवमाने, तसेच अनेक माजी नगरसेवक व असंख्य कार्यकर्त्यांनी राष्ट्रवादी काँग्रेस पक्षात जाहीर प्रवेश केला. सर्व नवप्रवेशितांचे मनापासून स्वागत करत, त्यांच्या पुढील राजकीय व सामाजिक वाटचालीसाठी शुभेच्छा देण्यात आल्या.
यावेळी बोलताना सांगण्यात आले की, शिव–शाहू–फुले–आंबेडकर यांच्या पुरोगामी विचारधारेवर राष्ट्रवादी काँग्रेस पक्षाची वाटचाल सुरू आहे. समाजातील प्रत्येक घटकाला न्याय देणारा, सर्वसमावेशक विकास साधणारा पक्ष म्हणून राष्ट्रवादी काँग्रेसची ओळख आहे. नवीन नेतृत्वाला संधी देणे, कार्यकर्त्यांना पुढे आणणे आणि सामान्य माणसाचा आवाज थेट शासनापर्यंत पोहोचवणे, हेच पक्षाचे मुख्य ध्येय असल्याचे स्पष्ट करण्यात आले.
शेतकरी, कष्टकरी, युवक, महिला आणि सर्व समाजघटकांच्या विकासासाठी पक्ष कटिबद्ध असल्याचे सांगत, शेती, शिक्षण, कला, कौशल्य विकास, तीर्थक्षेत्र विकास आणि आधुनिक तंत्रज्ञानासह कृत्रिम बुद्धिमत्ता (AI) चा प्रभावी वापर करून महाराष्ट्राचा सर्वांगीण विकास साधण्याचा संकल्प व्यक्त करण्यात आला. विशेषतः ग्रामीण भागातील मुलांना दर्जेदार शिक्षण मिळावे, यासाठी नवनवीन योजना आणि उपाययोजना राबवण्यावर भर देण्यात येणार असल्याचे सांगण्यात आले.
“आपल्या कामाच्या माध्यमातून जनतेचा विश्वास जिंकणे, हीच आमची खरी ताकद आहे,” असे नमूद करत, जनतेला विश्वासात घेऊन, कायदा-सुव्यवस्था राखत लोकसेवेचे कार्य अधिक गतिमान करण्यासाठी आम्ही सदैव तत्पर आहोत, असा निर्धार व्यक्त करण्यात आला. आगामी निवडणुकांच्या पार्श्वभूमीवर सर्व पदाधिकारी व कार्यकर्त्यांनी समन्वयाने काम करणे, स्थानिक पातळीवरील सर्वसामान्यांचे प्रश्न सोडवणे अत्यंत आवश्यक असल्याचेही आवाहन करण्यात आले.
नवीन सहकाऱ्यांचा अनुभव, कार्यशैली आणि जनसंपर्क पक्षासाठी निश्चितच उपयुक्त ठरेल, असा विश्वास व्यक्त करत, सांगली-मिरज-कुपवाड महापालिकेवर राष्ट्रवादी काँग्रेसचा झेंडा फडकवण्यासाठी सर्वांनी एकजुटीने काम करण्याचा निर्धार या मेळाव्यात करण्यात आला.
