पुणे शहराच्या सर्वांगीण विकासाला गती देणारा भव्य सोहळा आज पार पडला. पुणे महानगरपालिका आणि महाराष्ट्र मेट्रो रेल कॉर्पोरेशनच्या सुमारे ३,००० कोटी रुपयांच्या तब्बल ५३ विविध विकासकामांचे भूमिपूजन व लोकार्पण मुख्यमंत्री मा. श्री. देवेंद्रजी फडणवीस यांच्या प्रमुख उपस्थितीत करण्यात आले. या महत्त्वपूर्ण कार्यक्रमाला उपमुख्यमंत्री मा. श्री. अजितदादा पवार यांचीही उपस्थिती लाभली.
या वेळी बोलताना मुख्यमंत्री देवेंद्र फडणवीस यांनी सांगितले की, पुणे शहराच्या पायाभूत सुविधांचा मजबूत पाया घालण्यासाठी सरकारने जवळपास ४०,००० कोटी रुपयांची विकासकामे हाती घेतली आहेत. वाढती लोकसंख्या, वाहतूक कोंडी आणि भविष्यातील गरजा लक्षात घेऊन मेट्रोचे जाळे अधिक व्यापक स्वरूपात विस्तारले जात असून, या कामांमध्ये पुढील ५० वर्षांचा दूरगामी विचार, AI तंत्रज्ञानाचा वापर आणि उच्च दर्जाची गुणवत्ता यांवर विशेष भर दिला जात आहे. शहरातील वाढती वाहतूक कोंडी कायमस्वरूपी सोडवण्यासाठी पुणे मेट्रो हा महत्त्वाचा पर्याय ठरणार असून, येत्या काळात पुणे मेट्रोचा विस्तार सुमारे २०० किलोमीटरपर्यंत करण्याचा प्रस्ताव सरकारसमोर आहे. यासाठी निधीची कोणतीही कमतरता भासू दिली जाणार नाही, असा ठाम विश्वास मुख्यमंत्री फडणवीस यांनी व्यक्त केला.
पुणे व पिंपरी-चिंचवड शहरांच्या वाढत्या लोकसंख्येमुळे निर्माण होत असलेल्या पाणीटंचाईच्या समस्येवरही सरकारने ठोस पावले उचलली आहेत. टाटा समूहाच्या धरणांमधून पाणी उपलब्ध करून देण्याचा निर्णय घेतल्याने भविष्यातील पाणीपुरवठ्याचा प्रश्न मोठ्या प्रमाणात सुटणार आहे, असे यावेळी सांगण्यात आले. विकासकामांसोबतच पर्यावरणाचे संतुलन राखणेही तितकेच महत्त्वाचे असल्याचे नमूद करत, शहरातील वाढत्या प्रदूषणावर नियंत्रण आणण्यासाठी प्रभावी उपाययोजना राबवणे आवश्यक असल्याचे मत यावेळी व्यक्त करण्यात आले. यासाठी सरकार, स्थानिक स्वराज्य संस्था आणि लोकप्रतिनिधींनी एकत्रितपणे काम करणे गरजेचे असल्यावर भर देण्यात आला.
दरम्यान, ‘पुणे ग्रँड टूर’ या आंतरराष्ट्रीय सायकल स्पर्धेमुळे राज्याच्या अर्थव्यवस्थेला मोठी चालना मिळणार असून, या निमित्ताने रस्ते विकास, शहर सुशोभिकरण आणि नागरी सुविधांच्या सुधारणा वेगाने केल्या जाणार आहेत. त्यामुळे पुणे शहराला आंतरराष्ट्रीय स्तरावर नवी ओळख मिळणार आहे. कायदा व सुव्यवस्थेच्या दृष्टीनेही सरकार कटिबद्ध असून, पोलीस दलाला आवश्यक ते सर्व सहकार्य कायम दिले जाईल, असे स्पष्ट करण्यात आले. पुणे शहर व ग्रामीण भागातील नागरिकांना सुरक्षित आणि सुसह्य जीवन मिळावे यासाठी पोलीस दलाने अधिक दक्षता घ्यावी, अशा सूचनाही यावेळी देण्यात आल्या.
कार्यक्रमाच्या शेवटी, पुणे शहरातील नागरिकांसाठी आवश्यक त्या सर्व मूलभूत सुविधा उपलब्ध करून देण्यासाठी सरकार सदैव तत्पर राहील, असा विश्वास मुख्यमंत्री देवेंद्र फडणवीस आणि उपमुख्यमंत्री अजितदादा पवार यांनी व्यक्त केला. हा विकासाचा प्रवास पुण्याला भविष्यातील स्मार्ट, सुरक्षित आणि आधुनिक शहर बनवण्याच्या दिशेने नेणारा ठरणार असल्याचे मत यावेळी व्यक्त करण्यात आले.
