पुणे शहराने पुन्हा एकदा सामाजिक बांधिलकीचा सुंदर आदर्श समोर ठेवत इतिहास रचला आहे. मुरलीधर मोहोळ यांच्या वाढदिवसाच्या संकल्पापोटी आयोजित ‘रक्तदान महासंकल्प दिवस’ उपक्रमाला पुणेकरांनी उत्स्फूर्त प्रतिसाद देत तब्बल ३०,३३८ रक्तपिशव्यांचे संकलन करून नवा विक्रम केला आहे.
या उपक्रमाअंतर्गत पुणे शहरातील ५६ रक्तदान शिबिरांचे जाळे उभे करण्यात आले होते. शहराच्या विविध भागांमध्ये युवापिढीपासून ते ज्येष्ठ नागरिकांपर्यंत सर्वांनी मोठ्या संख्येने उपस्थित राहून मानवी सेवेची अनोखी परंपरा जिवंत ठेवली.
मुरलीधर मोहोळ यांनी या उपक्रमात सहभागी झालेल्या प्रत्येक रक्तदात्यांचे, स्वयंसेवकांचे, आयोजकांचे, रुग्णालय कर्मचारी, समाजसेवी संस्था, मित्र-परिवार आणि कार्यकर्त्यांचे मनःपूर्वक आभार मानले.
त्यांनी सांगितले की, “रक्तदान ही केवळ दानशूरतेची कृती नाही, तर एखाद्या जीवाला नवीन आयुष्य देण्याचा संकल्प आहे. पुणेकरांनी दिलेला हा प्रतिसाद माझ्या आयुष्यातील सर्वात मोठी भेट आहे.”
पार्श्वभूमीवर पाहिल्यास, काही महिन्यांपासून रुग्णालयांमध्ये रक्ताची कमतरता जाणवत होती. अशा वेळी या उपक्रमामुळे पुण्यातील रक्तपेढ्यांना नवसंजीवनी मिळाली आहे. डॉक्टरांच्या मते, एवढ्या मोठ्या प्रमाणात संकलित झालेले रक्त आपत्कालीन परिस्थिती, अपघातग्रस्त, गर्भवती महिला, कॅन्सर रुग्ण व शस्त्रक्रिया रुग्णांसाठी फार महत्त्वाचे ठरणार आहे.
रक्तदान शिबिरांचे आयोजन अत्यंत नियोजनबद्ध प्रकारे करण्यात आले होते. सर्व केंद्रांवर वैद्यकीय पथके, सुरक्षा व्यवस्था, थंडसाखळी आणि नोंदणी प्रणाली सुरळीत ठेवण्यात आली. काही ठिकाणी महिला, विद्यार्थी आणि सामाजिक संस्थांनी विशेष मोहीमा राबवून अधिकाधिक लोकांना सहभागी करून घेतले.
मुरलीधर मोहोळ यांचा हा ‘रक्तदान महासंकल्प दिवस’ उपक्रम आता पुण्यातील सामाजिक प्रबोधनाचा एक मोठा उत्सव बनत चालला आहे.
