येरवडा पोलिसांची शिताफी! मकोका अंतर्गत फरार आरोपीला थरारक पाठलाग करून जेरबंद — पुणे पोलीस गुन्हे शाखेची मोठी कामगिरी

पुणे — शहरात संघटित गुन्हेगारीवर कडक कारवाई सुरू असताना येरवडा पोलिसांनी मकोका अंतर्गत फरार असलेल्या आरोपीला नाट्यमय पाठलाग करून पकडत मोठी कामगिरी बजावली आहे. अनेक दिवसांपासून पोलिसांना चकवा देणारा आणि सतत मोबाईल नंबर, वास्तव्य व ओळख बदलत फिरणारा आरोपी अखेर कायद्याच्या कचाट्यात अडकला.

🔸 गुन्ह्याची पार्श्वभूमी — गंभीर कलमांखाली दाखल गुन्हा

येरवडा पोलीस स्टेशनमध्ये गु.र. नं. ४३६/२०२५ अंतर्गत भारतीय न्याय संहिता २०२३ कलम ११८(२)(३)(५), भारतीय हत्यार कायदा ४, २५, महाराष्ट्र पोलीस अधिनियम, क्रिमिनल लॉ अमेंडमेंट ३, ७ आणि महाराष्ट्र संघटित गुन्हेगारी नियंत्रण अधिनियम (मकोका) यांखाली गंभीर गुन्हा दाखल होता.
कारवाईची चाहूल लागताच आरोपी फरार झाला होता, मात्र वरिष्ठ अधिकाऱ्यांनी तात्काळ आरोपीला ताब्यात घेण्याचे आदेश दिले होते.

🔸 मोबाईल ट्रॅकिंगपासून ते पाळत — पोलिसांची सखोल तपासनीती

वरिष्ठ पोलीस निरीक्षक अंजुम बागवान यांच्या मार्गदर्शनाखाली पोलीस अंमलदार शैलेश वाबळे यांनी आरोपीचा वापरात असलेला मोबाईल क्रमांक शोधला. पण आरोपी सतत नंबर व ठिकाण बदलत असल्याने तपास अधिक गुंतागुंतीचा बनला.
दरम्यान, पोउनि प्रदीप सुर्वे यांना त्यांच्या खबऱ्याकडून महत्त्वाची माहिती मिळाली —
सदर आरोपी पुणे–सोलापूर मार्गाने गावी पसार होण्याच्या तयारीत आहे.

ही माहिती खात्रीलायक ठरल्याने तपास पथक तात्काळ हालचालीस आले.

🔸 नाट्यमय पाठलाग — ट्रॅव्हल्स बस थांबवून आरोपीला शिताफीने ताब्यात

पोउनि सुर्वे, पोलीस कर्मचारी जायभाय, कांबळे, शिंदे यांनी मिळालेल्या माहितीच्या आधारे ठिकाणी सापळा रचला.
काही वेळ पाळत ठेवल्यानंतर आरोपी खाजगी ट्रॅव्हल्सने गावी निघाल्याचे स्पष्ट झाले.

पथकाने गाडीचा अचूक दिशेने पाठलाग करत आरोपीला शिताफीने अटक केली. विचारपूस केली असता त्याने आपले नाव –
अजय युवराज कसबे (वय २४, रा. भिमज्योत मित्र मंडळ, लक्ष्मीनगर, येरवडा, पुणे)
असे सांगितले.

आरोपीला लगेच येरवडा पोलीस स्टेशनमध्ये आणण्यात आले असून पुढील तपास मा. सहायक पोलीस आयुक्त प्रांजली सोनवणे या करत आहेत.

🔸 पोलिसांची टीमवर्क — वरिष्ठांचे मार्गदर्शन आणि पथकाची धडाकेबाज कारवाई

ही संपूर्ण कारवाई खालील वरिष्ठ अधिकाऱ्यांच्या मार्गदर्शनाखाली पार पडली:

• मा. अप्पर पोलीस आयुक्त (पूर्व विभाग) श्री. मनोज पाटील

• पोलीस उपायुक्त, परिमंडळ ०४ श्री. सोमय मुंडे

• सहा. पोलीस आयुक्त, येरवडा विभाग श्रीमती प्रांजली सोनवणे

• वरिष्ठ पोलीस निरीक्षक अंजुम बागवान

• पोलीस निरीक्षक (गुन्हे) विजय ठाकर

तपास पथकातील अधिकारी व कर्मचारी :
पोउनि महेश फटांगरे, पोउनि प्रदिप सुर्वे, अंमलदार शिंदे, कोकणे, वाबळे, जायभाय, सोगे, कांबळे, सुतार, जाधव, अडकमोल, गायकवाड, निलख यांनी उत्कृष्ट टीमवर्कने कारवाई केली.