पुणे शहर गुन्हे शाखेच्या युनिट ६ कडून आणखी एक प्रभावी आणि धाडसी कारवाई करण्यात आली आहे. तडीपार आरोपी आदित्य दिपक कांबळे (वय १९, रा. वाघोली) यास पोलिसांनी धारदार शस्त्रासह ताब्यात घेतलं आहे. ही कारवाई दि. ४ नोव्हेंबर २०२५ रोजी रायसोनी कॉलेज लगतच्या मैदानात, डोमखेलवस्ती रोड, आव्हाळवाडी येथे करण्यात आली.
घटना सविस्तर :
गुन्हे शाखा युनिट ६ चे पोलीस निरीक्षक श्री. वाहीद पठाण आणि त्यांचे पथक हे गुन्हे प्रतिबंधक गस्तीदरम्यान कार्यरत असताना, पोलिस अंमलदार नितीन धाडगे यांना गुप्त माहिती मिळाली की, तडीपार आरोपी आदित्य कांबळे धारदार हत्यारासह परिसरात थांबलेला आहे. त्यानुसार पोलिस पथकाने तत्काळ छापा टाकला. पोलिसांना पाहताच आरोपीने हातातील शस्त्र लपविण्याचा प्रयत्न केला, मात्र पथकाने वेळीच प्रतिसाद देत त्याला धारदार हत्यारासह ताब्यात घेतले.
पोलिस तपासात हे स्पष्ट झाले की, सदर इसम तडीपार असूनही परिसरात फिरत होता आणि गुन्हेगारी हालचालींसाठी सक्रिय होता. त्यामुळे त्याच्यावर वाघोली पोलिस ठाण्यात गुन्हा दाखल करण्यात आला आहे.
वरिष्ठ अधिकाऱ्यांचे मार्गदर्शन :
ही यशस्वी कारवाई मा. अपर पोलीस आयुक्त (गुन्हे) श्री. पंकज देशमुख, मा. पोलीस उपआयुक्त (गुन्हे) श्री. निखिल पिंगळे, आणि मा. सहाय्यक पोलीस आयुक्त (गुन्हे) श्री. राजेंद्र मुळीक यांच्या मार्गदर्शनाखाली पार पडली.
ही कारवाई युनिट ६ चे पोलीस निरीक्षक श्री. वाहीद पठाण यांच्या सूचनेनुसार आणि नेतृत्वाखाली करण्यात आली असून, या मोहिमेत सहा. पोलीस निरीक्षक मदन कांबळे आणि पोलिस अंमलदार सारंग दळे, बाळासाहेब सकटे, निलेश साळवे, विनायक साळवे, गिरीष नाणेकर, कानिफनाथ कारखेले, नितीन मुंढे, सुहास तांबेकर, नेहा तापकीर, नितीन धाडगे, ऋषीकेश व्यवहारे, शेखर काटे, प्रतिक्षा पानसरे, कीर्ती मांदळे आणि सोनाली नरवडे यांनी विशेष परिश्रम घेतले.
पोलिसांचे आवाहन :
पुणे पोलिसांनी नागरिकांना आवाहन केले आहे की, संशयास्पद हालचाली, गुन्हेगारी प्रवृत्तीची माहिती त्वरित पोलिसांना कळवा. आपली छोटीशी माहिती मोठा गुन्हा रोखू शकते आणि शहरात शांतता व सुरक्षेचे वातावरण टिकवून ठेवण्यास मदत करते.
