मुंबई, ४ नोव्हेंबर २०२५ – बांधकामादरम्यान झालेल्या सुरक्षा त्रुटींमुळे एका तरुणीचा मृत्यू झाल्याच्या प्रकरणात मुंबई सत्र न्यायालयाने बांधकाम व्यावसायिक भावेश संघराजका (वय ४३) यांचा अटकपूर्व जामीन अर्ज फेटाळला आहे.
संसकृती अमिन (वय २२) या तरुणीचा ७ ऑक्टोबर रोजी बांधकाम सुरू असलेल्या इमारतीच्या १९व्या मजल्यावरून पडलेल्या सिमेंट ब्लॉकने जागीच मृत्यू झाला होता. या घटनेनंतर समाजात संतापाची लाट उसळली होती.
न्यायमूर्ती टी. टी. आगळवे यांनी निकाल देताना नमूद केले की, “फोटो पाहता स्पष्ट दिसते की, सुरक्षा जाळ्या अनेक ठिकाणी फाटलेल्या आहेत आणि त्यावर जड साहित्य टांगलेले आहे. हे ‘सुरक्षा जाळे’ म्हणण्यासारखे नाहीत.” तसेच त्यांनी सरकारने जारी केलेल्या उंच इमारतींसाठीच्या ‘स्पेशल सेफ्टी कंट्रोल गाईडलाईन्स’चे उल्लंघन झाल्याचे स्पष्ट संकेत मिळतात, असेही निरीक्षण नोंदवले.
न्यायालयाने पुढे नमूद केले की, “सिमेंट ब्लॉक इमारतीतून बाहेर रस्त्यावर पडला, जो सामान्य नागरिक वापरत होते. त्या रस्त्याच्या सुरक्षिततेसाठी कोणताही तात्पुरता आर्केड बांधण्यात आलेला नाही. हे दुर्लक्ष गंभीर स्वरूपाचे आहे.”
या प्रकरणात पोलिसांनी सांगितले की, तपास प्राथमिक टप्प्यात आहे आणि या घटनेबद्दल नेमकी जबाबदारी निश्चित करण्यासाठी आरोपीची कोठडी आवश्यक आहे. त्यामुळे बिल्डरचा जामीन अर्ज नाकारण्यात आला.
पीडित तरुणीचे वडील अनिल अमिन यांनी वकील निनाद मुझुमदार यांच्या माध्यमातून न्यायालयात जोरदार विरोध नोंदवला. दरम्यान, या दुर्घटनेनंतर बांधकामस्थळांवरील सुरक्षा उपाययोजनांविषयी गंभीर प्रश्न उपस्थित झाले आहेत. नागरिकांनी आणि कामगार संघटनांनी अशा घटनांची पुनरावृत्ती टाळण्यासाठी कठोर पावले उचलण्याची मागणी केली आहे.
