पुणे जिल्ह्यातील शिरूर तालुक्यातील पिंपळखेड (आंबेवाडी) गावात रविवारी दुपारी घडलेल्या बिबट्याच्या हल्ल्यात १३ वर्षीय मुलगा रोहन विलास बॉंबे (वय १३ वर्षे) याचा दुर्दैवी मृत्यू झाला. दुपारी साधारण ३.४५ वाजता ही घटना घडली असून, या घटनेने परिसरात भीतीचं आणि शोकाचं वातावरण निर्माण झालं आहे.
स्थानिकांच्या म्हणण्यानुसार, रोहन हा शेताच्या परिसरात खेळत असताना झुडपातून अचानक बिबट्याने झडप घालून त्याच्यावर हल्ला केला. जवळच्या लोकांनी आरडाओरड करत मदत करण्याचा प्रयत्न केला, मात्र तोपर्यंत बिबट्याने त्याला गंभीर दुखापत केली होती. त्याला तातडीने रुग्णालयात नेण्यात आलं, पण उपचाराआधीच त्याचा मृत्यू झाला.
घटनेनंतर मुख्य वनसंरक्षकांनी तत्काळ आदेश देत संबंधित बिबट्याला पकडण्यास — अथवा आवश्यक असल्यास ठार मारण्यास परवानगी दिली आहे. सध्या वन विभागाने मोठ्या प्रमाणावर शोधमोहीम हाती घेतली असून, २५ पिंजरे बसवण्यात आले आहेत आणि १० ट्रॅप कॅमेरे लावण्यात आले आहेत.
याशिवाय ड्रोनद्वारे गस्त, आणि परिसरातील गावांमध्ये जनजागृती मोहिमाही सुरू करण्यात आली आहे, जेणेकरून नागरिक सुरक्षित राहतील आणि बिबट्याच्या हालचालींबाबत त्वरित माहिती मिळेल.
ही मोहीम वनसंरक्षक आशिष ठाकरे आणि जिल्हा उपवनसंरक्षक (जुन्नर विभाग) प्रशांत खाडे यांच्या मार्गदर्शनाखाली, तसेच सहाय्यक वनसंरक्षक स्मिता राजहंस, अमृत शिंदे, रेंज फॉरेस्ट ऑफिसर निलकंठ गव्हाणे आणि स्थानिक वनकर्मचारी यांच्या मदतीने सुरू आहे.
दरम्यान, पिंपळखेड, आंबेवाडी, माळेगाव आणि आसपासच्या भागात नागरिकांमध्ये भीतीचं वातावरण निर्माण झालं असून, शाळांनाही काही ठिकाणी सुट्टी देण्यात आली आहे. वन विभाग नागरिकांना रात्रीच्या वेळी शेतात किंवा निर्जन भागात जाणं टाळण्याचं आवाहन करत आहे. या घटनेनंतर स्थानिक ग्रामस्थांनी वन विभागाने गावाजवळ कायमस्वरूपी संरक्षण भिंती आणि बिबट्याच्या हालचालींसाठी कायम पथक नेमावं अशी मागणी केली आहे.
