पुणे: अंमली पदार्थांच्या विरोधात पुणे पोलिसांची निर्णायक पावले सुरूच आहेत. पुणे शहर पोलिसांच्या अंमली पदार्थ विरोधी पथक-१ व २ यांनी तब्बल ₹१,७५,०६,५८०/- (एक कोटी पंचाहत्तर लाख सहा हजार पाचशे ऐंशी रुपये) किंमतीचे विविध अंमली पदार्थ नष्ट करून मोठी कारवाई केली आहे. या अंमली पदार्थांमध्ये गांजा, एम.डी, कोकेन, हेरॉईन, एम.डी.एम.ए., अफूची झाडे, मेथाम्फेटामाइन, बांटा गोळ्या, इडुलिस खत, चरस यांचा समावेश होता.
ही कारवाई पुणे पोलीस आयुक्तालयातील मुद्देमाल नाश कमिटीच्या देखरेखीखाली पार पडली. समितीचे अध्यक्ष मा. अपर पोलीस आयुक्त (गुन्हे) श्री. पंकज देशमुख तर सदस्य म्हणून पोलीस उप-आयुक्त (गुन्हे) श्री. निखील पिंगळे, पोलीस उप-आयुक्त (मुख्यालय) श्रीमती राजलक्ष्मी शिवणकर, तसेच न्यायवैद्यकीय व पर्यावरण विभागातील अधिकारी उपस्थित होते.
राजगाव येथील एम.ई.पी.एल. कंपनीच्या भट्टीत सर्व अंमली पदार्थ जाळून नष्ट करण्यात आले. ही प्रक्रिया भारत सरकारच्या अर्थ मंत्रालय, महसूल विभाग आणि महाराष्ट्र शासनाच्या गृह विभागाच्या अधिसूचनांनुसार करण्यात आली.
या मोहिमेत एकूण ३२ गुन्ह्यांमधील जप्त अंमली पदार्थांचा नाश करण्यात आला, जे ५ पोलीस ठाण्यांच्या तपासांशी संबंधित होते. या महत्त्वाच्या कारवाईत अंमली पदार्थ विरोधी पथक १ व २, गुन्हे शाखा, पुणे शहरातील अधिकारी व कर्मचारी यांनी सहभाग घेतला. पोलीस निरीक्षक प्रशांत अन्नछत्रे, सहा. पोलीस निरीक्षक अनिल सुरवसे, नितीनकुमार नाईक, तसेच पोलीस उपनिरीक्षक अस्मिता लाड यांच्या नेतृत्वाखाली अंमलदारांच्या पथकाने ही कारवाई पार पाडली. या कारवाईमुळे पुणे शहरात अंमली पदार्थांचा प्रसार रोखण्यासाठी पोलीस प्रशासनाने घेतलेले पाऊल अत्यंत प्रभावी ठरले आहे. पोलिसांचे हे पाऊल समाजामध्ये नशामुक्तीचा संदेश देणारे ठरत आहे.
🔹 महत्त्वाचे मुद्दे:
-
एकूण ₹१.७५ कोटींच्या अंमली पदार्थांचा नाश
-
३२ गुन्ह्यांमधील मुद्देमाल नष्ट
-
भारत सरकार व राज्य शासनाच्या अधिसूचनेनुसार कारवाई
-
एम.ई.पी.एल. कंपनीच्या भट्टीत पदार्थांचा सुरक्षित नाश
-
अंमली पदार्थ विरोधी पथकाची उत्कृष्ट कामगिरी
