मंत्रालय, मुंबई | दु. १.३० वा. | २८ ऑक्टोबर २०२५
महाराष्ट्र सरकारकडून पर्यावरण संवर्धन आणि हवामान बदलाच्या परिणामांना तोंड देण्यासाठी एक महत्त्वपूर्ण उपक्रम उचलण्यात आला आहे. मुख्यमंत्री देवेंद्र फडणवीस यांनी फेब्रुवारी २०२६ मध्ये होणाऱ्या ‘मुंबई क्लायमेट वीक’ची घोषणा करत त्याच्या लोगोचे अनावरण मंत्रालयात केले.
या प्रसंगी मंत्री पंकजा मुंडे, ‘प्रोजेक्ट मुंबई’चे संस्थापक व मुख्य कार्यकारी अधिकारी शिशिर जोशी, तसेच विविध विभागांचे वरिष्ठ अधिकारी उपस्थित होते. या कार्यक्रमाचा उद्देश मुंबईला शाश्वत आणि पर्यावरणपूरक शहर बनविणे, तसेच हवामान बदलाशी लढण्यासाठी नागरिक, उद्योग आणि प्रशासन यांच्यातील समन्वय वाढविणे हा आहे.
मुख्यमंत्री देवेंद्र फडणवीस यांनी यावेळी सांगितले की,
“मुंबई क्लायमेट वीक हा महाराष्ट्राच्या हरित भविष्याचा पाया ठरणार आहे. पर्यावरणाचे संरक्षण आणि टिकाऊ विकास हे एकत्रितपणे साध्य करण्यासाठी सरकार कटिबद्ध आहे.”
या आठवड्यात विविध परिषद, कार्यशाळा, शैक्षणिक उपक्रम आणि हरित तंत्रज्ञान प्रदर्शनाचे आयोजन करण्यात येणार आहे. यात देश-विदेशातील पर्यावरणतज्ज्ञ, उद्योगक्षेत्रातील प्रतिनिधी आणि सामाजिक संस्था सहभागी होणार आहेत. मुंबईतील हवामान विषयक आव्हानांना तोंड देण्यासाठी ही एक सर्वसमावेशक आणि लोकसहभागावर आधारित मोहीम असेल.
मंत्री पंकजा मुंडे यांनीही या उपक्रमाचे कौतुक करत सांगितले की,
“हवामान बदलाचा परिणाम सर्वांवर होतो, त्यामुळे सरकारसोबत नागरिकांनीही या उपक्रमात सक्रिय सहभाग घ्यावा.”
‘प्रोजेक्ट मुंबई’चे संस्थापक शिशिर जोशी यांनी सांगितले की,
“मुंबई क्लायमेट वीकद्वारे नागरिकांमध्ये जागरूकता वाढवून, शहराला अधिक स्वच्छ, हरित आणि टिकाऊ बनवण्याचा आमचा प्रयत्न असेल.”
