पुणे – शहरातील कायदा-सुव्यवस्थेचा धागा मजबूत ठेवण्यासाठी पुणे पोलिस सतत दक्ष आहेत. याच सतर्कतेचे उदाहरण म्हणजे विश्रामबाग पोलीस ठाण्याच्या पथकाने केलेली अत्यंत यशस्वी कारवाई. पोलिसांनी गोपनीय माहितीच्या आधारे दोन गावठी पिस्तुलं आणि एक काडतूस बाळगणाऱ्या तरुणाला अटक करत मोठा गुन्हा रोखला आहे.
विश्रामबाग पोलीस स्टेशनच्या हद्दीत पेट्रोलिंग दरम्यान पोलीस अंमलदार आशिष खरात आणि अनिस शेख यांना गोपनीय बातमी मिळाली की, राजेंद्रनगर परिसरात सार्वजनिक रस्त्याच्या कडेला एक इसम संशयास्पद स्थितीत उभा आहे. पोलिसांनी तातडीने त्या ठिकाणी पोहोचून तपास केला असता, एक तरुण संशयास्पद हालचाली करताना आढळला.
पोलिसांनी त्याला थांबवून विचारपूस केली असता त्याने आपले नाव मयूर सचिन भोसले (वय २० वर्षे, रा. पापळ वस्ती, गणपत नगर, बिबवेवाडी, पुणे) असे सांगितले. झडती घेतल्यावर पोलिसांना अंदाजे ₹१,००,२०० किंमतीची दोन गावठी पिस्तुलं आणि एक जिवंत काडतूस मिळाले.
पोलिसांनी तत्काळ ती शस्त्रे जप्त करून त्याला ताब्यात घेतले. त्याच्याविरुद्ध विश्रामबाग पोलीस ठाण्यात गु.र.नं. २९०/२०२५, आर्म्स अॅक्ट कलम ३(२५) आणि महाराष्ट्र पोलीस अधिनियम कलम ३७(१)(३) सह १३५ अंतर्गत गुन्हा दाखल करण्यात आला आहे.
ही कारवाई विश्रामबाग पोलिसांच्या सतर्कतेचे आणि अचूक माहितीवर जलद कृती करण्याच्या क्षमतेचे द्योतक आहे. पुणे पोलिसांनी वेळेवर कारवाई करून शहरात होऊ शकणारी गंभीर घटना टाळली आहे.
या प्रकरणाचा पुढील तपास सहायक पोलीस निरीक्षक राजेश उसगावकर करीत आहेत. संपूर्ण कारवाई मा. अपर पोलीस आयुक्त (पश्चिम प्रादेशिक विभाग) श्री. राजेश बनसोडे, मा. पोलीस उपआयुक्त (परिमंडळ ०१) श्री. कृषीकेश रावले, आणि मा. सहायक पोलीस आयुक्त (विश्रामबाग विभाग) श्री. साईनाथ ठोंबरे यांच्या मार्गदर्शनाखाली करण्यात आली.
या यशस्वी मोहिमेत वरिष्ठ पोलीस निरीक्षक प्रदीप कसबे, पोलीस निरीक्षक (गुन्हे) अरुण घोडके, तसेच सहायक पोलीस निरीक्षक राजेश उसगावकर यांच्या नेतृत्वाखालील पथकातील सचिन कदम, गणेश काठे, शैलेश सुर्वे, सचिन अहिवळे, अमोल भासेले, जाकीर मणियार, आशिष खरात, अर्जुन थोरात, राहुल मोरे, अनिस शेख, नितीन बाबर, सागर मोरे, शिवा गायकवाड व राहुल माळी यांनी उल्लेखनीय कामगिरी बजावली.
या घटनेमुळे पुणे शहर पोलिसांनी पुन्हा एकदा हे दाखवून दिले आहे की गुन्हेगारी वृत्ती असलेल्या व्यक्तींना शहरात स्थान नाही, आणि पोलिसांची नजर नेहमीच सजग आहे.
