हडपसर पोलिसांची धडाकेबाज कारवाई! चैन स्नॅचिंग टोळीचा पर्दाफाश, तब्बल ₹७.०४ लाखांचा मुद्देमाल हस्तगत

पुणे शहर पोलिसांच्या हडपसर पोलीस ठाण्याने मोठी कारवाई करत चैन स्नॅचिंग करणाऱ्या दोन सराईत गुन्हेगारांना अटक केली असून, तब्बल ₹७,०४,६००/- किमतीचा मुद्देमाल जप्त करण्यात आला आहे. गेल्या काही महिन्यांपासून हडपसर व परिसरात महिलांना लक्ष्य करून चैन चोरीचे प्रकार वाढले होते. विशेषतः संध्याकाळच्या वेळेत गर्दीच्या बाजारपेठा आणि मंदिर परिसरात महिलांच्या गळ्यातील चैन हिसकावण्याचे प्रकार घडत होते.

या वाढत्या घटनांवर नियंत्रण मिळवण्यासाठी मा. पोलिस आयुक्त, पुणे शहर यांच्या सूचनेनंतर परिमंडळ ५ चे पोलीस उपायुक्त डॉ. राजकुमार शिंदे यांनी हडपसर पोलीस ठाण्यात विशेष बैठक घेऊन आवश्यक सूचना दिल्या. त्यानुसार वरिष्ठ पोलीस निरीक्षक संजय मोगले, पोनि. निलेश जगदाळे व पोनि. अश्विनी जगताप यांच्या मार्गदर्शनाखाली विशेष तपास पथक कार्यरत करण्यात आले.

तपास पथकाने गुन्ह्यांचा सखोल अभ्यास करताना असे आढळले की, आरोपी शेवाळवाडी भाजी मार्केट, महादेव मंदिर, गाडीतळ, हडपसर व मांजरी परिसरात रात्री ७.३० ते ९.३० या वेळेत गुन्हे करत होते. गर्दीचा फायदा घेत महिलांना लक्ष्य करून ते सोन्याच्या चैन हिसकावत आणि लगेच पुणे-सोलापूर महामार्गावरून पसार होत.

दि. १८ ऑगस्ट रोजी गुप्त माहितीवरून पोलीस उपनिरीक्षक हसन मुलाणी व त्यांच्या पथकाने अनिकेत विजय चव्हाण (२४, रा. हडपसर) आणि ज्ञानेश्वर भिकाजी चव्हाण (२३, रा. सोलापूर) यांना ताब्यात घेतले. चौकशीत त्यांनी कबुली दिली की त्यांनी वेळोवेळी हडपसर परिसरात चैन स्नॅचिंग केले आहे.

या दोन्ही आरोपींवर हडपसर पोलीस ठाण्यातील ५ गुन्हे उघड झाले आहेत. त्यांच्याकडून ४५.५४० ग्रॅम सोन्याचे दागिने (किंमत ₹४.५४ लाख), होंडा युनिकॉर्न, हिरो एक्स्ट्रीम दुचाकी, बनावट नंबर प्लेट्स, स्क्रू ड्रायव्हर, मास्क आणि काळी पिशवी असा एकूण ₹७.०४ लाखांचा मुद्देमाल जप्त करण्यात आला. विशेष म्हणजे, आरोपी ज्ञानेश्वर भिकाजी चव्हाण याच्यावर यापूर्वी हडपसर, वानवडी, सिंहगड, बिबवेवाडी, भारती विद्यापीठ व समर्थ पोलीस ठाण्यात चैन स्नॅचिंगचे तब्बल १६ गुन्हे दाखल आहेत.

ही कारवाई अपर पोलीस आयुक्त मनोज पाटील, पोलीस उपायुक्त डॉ. राजकुमार शिंदे, सहाय्यक पोलीस आयुक्त अनुराधा उदमले यांच्या मार्गदर्शनाखाली पार पडली. संजय मोगले (वरिष्ठ पोलीस निरीक्षक), पोनि. निलेश जगदाळे, पोनि. अश्विनी जगताप यांच्या देखरेखीखाली पो.उ.नि. हसन मुलाणी, सत्यवान गेंड व अंमलदारांच्या पथकाने धडाकेबाज कामगिरी केली.

या यशस्वी कारवाईमुळे हडपसर परिसरातील नागरिकांनी दिलासा व्यक्त केला असून पोलिसांच्या कार्याचे जोरदार कौतुक होत आहे.