पुणे शहर गुन्हे शाखा युनिट ६ ने पुन्हा एकदा आपली चपळाई, कौशल्य आणि तात्काळ कारवाई यामुळे गुन्हेगारी जगतात खळबळ उडवली आहे. वाघोली परिसरात गंभीर गुन्ह्यात जामीनावर असलेल्या आरोपींकडून एकूण ४ देशी बनावटीच्या पिस्तुलांसह ५ जिवंत काडतुसे हस्तगत करण्यात पोलिसांना यश आले. जप्त केलेल्या मुद्देमालाची एकूण किंमत सुमारे ₹१,६२,००० इतकी आहे.
घटना तपशील
दिनांक ७ ऑगस्ट २०२५ रोजी, वाघोली पोलिस ठाण्याच्या हद्दीत गस्त घालत असताना, पोलिस अंमलदार नितीन धाडगे आणि निर्णय लांडे यांना मिळालेल्या गोपनीय माहितीनुसार, पोलिसांनी सापळा रचला. त्यात सुरज उर्फ नन्या संतोष मोरे आणि ओमकार अरुण नादवडेकर यांना भैरवनाथ तळ्याजवळून ताब्यात घेण्यात आले. त्यांच्या जवळून एक देशी पिस्तूल आणि एक जिवंत काडतूस सापडले.
यानंतर तपासाचा धागा पुढे नेत, सपोनि राकेश कदम आणि सपोनि मदन कांबळे यांच्या नेतृत्वाखालील पथकाने आणखी दोन आरोपी — जगदीश उर्फ जॅक्स शंकर दोडमनी आणि स्वयंम उर्फ आन्ना विजय सुर्वे — यांना येरवडा परिसरातून अटक केली. त्यांच्या ताब्यातून आणखी तीन देशी पिस्तुलं आणि चार जिवंत काडतुसे जप्त करण्यात आली.
गुन्हेगारी पार्श्वभूमी
अटक केलेले सर्व आरोपी पूर्वीपासूनच गंभीर गुन्ह्यांमध्ये सामील असून, यामध्ये खून, खुनाचा प्रयत्न, मारहाण, कटकारस्थान, बेकायदेशीर शस्त्रसाठा यांसारख्या गंभीर कलमांचा समावेश आहे.
कारवाईमागील पथक
ही धाडसी कारवाई अप्पर पोलीस आयुक्त (गुन्हे) श्री. पंकज देशमुख, उप-आयुक्त (गुन्हे) श्री. निखिल पिंगळे, सहाय्यक पोलीस आयुक्त (गुन्हे) श्री. राजेंद्र मुळीक यांच्या मार्गदर्शनाखाली पार पडली. यामध्ये गुन्हे शाखा युनिट ६ चे निरीक्षक वाहीद पठाण आणि त्यांच्या सहकाऱ्यांचा मोलाचा वाटा होता.
ही मोहीम केवळ गुन्हे रोखण्याच्या दिशेने मोठं पाऊल नाही, तर पुणे पोलिसांच्या सतर्कतेचा आणि गुन्हेगारीविरोधातील बांधिलकीचा पुरावा आहे.
