बेंगळुरू | पंतप्रधान नरेंद्र मोदी यांनी आज बेंगळुरूमध्ये नव्या ‘यलो लाईन’ मेट्रो मार्गाचं लोकार्पण करताच, स्वतः या मेट्रोमधून प्रवास करून नागरिकांशी संवाद साधला. त्यांनी आर. व्ही. रोड (रगिगुड्डा) येथून प्रवास सुरू करत, नव्याने उद्घाटन झालेल्या इलेक्ट्रॉनिक सिटी मेट्रो स्टेशनपर्यंत सफर केली. या प्रवासात त्यांनी सहप्रवाशांशी संवाद साधत, मेट्रोमुळे होणाऱ्या वेळेची बचत आणि सोयीसुविधांबाबत चर्चा केली.
यलो लाईन मेट्रो प्रकल्प हा बेंगळुरूच्या वाढत्या वाहतुकीला दिलासा देणारा महत्त्वाचा टप्पा मानला जातो. तंत्रज्ञान उद्योग, आयटी कंपन्या आणि व्यावसायिक केंद्रांनी गजबजलेल्या इलेक्ट्रॉनिक सिटी परिसरातील हजारो कर्मचाऱ्यांसाठी हा मार्ग मोठा दिलासा ठरणार आहे.
उद्घाटनावेळी पंतप्रधान मोदी म्हणाले की, “बेंगळुरू ही भारताच्या प्रगतीचं इंजिन आहे आणि या मेट्रो प्रकल्पामुळे शहरातील वाहतुकीचा ताण कमी होऊन नागरिकांच्या जीवनमानात सुधारणा होईल.” त्यांनी स्मार्ट अर्बन ट्रान्सपोर्ट ही भविष्यातील गरज असल्याचं अधोरेखित केलं.
नवीन यलो लाईनमध्ये अत्याधुनिक सुविधा, अधिक वेगवान ट्रेन, ऊर्जा बचत करणारी यंत्रणा, आणि प्रवासी सुरक्षेसाठी अत्याधुनिक सीसीटीव्ही प्रणाली बसवण्यात आली आहे. प्रवाशांनी या मार्गावरून पहिला प्रवास करताच सोशल मीडियावर फोटो आणि व्हिडिओ शेअर करून आनंद व्यक्त केला.
