शिरूर (पुणे) – एसटी महामंडळाच्या बसचालक आणि कंडक्टरवर लाकडी दांडक्याने हल्ला केल्याची धक्कादायक घटना शिरूर एसटी बस डेपोमध्ये घडली असून, या प्रकरणाचा व्हिडीओ सध्या सोशल मीडियावर जोरदार व्हायरल होत आहे. या घटनेमुळे एसटी कर्मचाऱ्यांमध्ये भीतीचे आणि संतापाचे वातावरण निर्माण झाले आहे.
ही घटना पुणे ते माजलगाव बससेवेतील असून, प्रवाशांमध्ये झालेल्या किरकोळ वादाचे पर्यवसान थेट हिंसक मारहाणीमध्ये झाले. मिळालेल्या माहितीनुसार, एक प्रवासी बसमध्ये चढत असताना कंडक्टरशी वाद झाला. त्यानंतर त्या प्रवाशाने फोन करून आणखी दोन साथीदारांना बोलावले. या तिघांनी मिळून बस डेपोमध्ये बसचालक आणि कंडक्टर यांना लाथाबुक्क्यांनी आणि लाकडाच्या दांड्याने जबर मारहाण केली.
यात कंडक्टरच्या खिशातील सुमारे २१ हजार रुपये गहाळ झाल्याची तक्रार करण्यात आली आहे. मारहाणीनंतर संबंधित कर्मचाऱ्यांनी शिरूर पोलीस ठाण्यात तक्रार दिली असून, अज्ञात तिघांविरोधात गुन्हा दाखल करण्यात आला आहे.
ही घटना डेपोमध्येच घडल्यामुळे सुरक्षा व्यवस्थेवर प्रश्नचिन्ह निर्माण झाले आहे. एसटी कर्मचाऱ्यांच्या सुरक्षेच्या दृष्टीने योग्य ती खबरदारी घेण्याची मागणी आता जोर धरत आहे.
शासन आणि एसटी प्रशासनाने याप्रकरणी तातडीने कारवाई करून दोषींवर कठोर शिक्षा करावी, अशी मागणी एसटी संघटनांनी केली आहे.
