पुणे | वारजे माळवाडी :- पुणे शहरातील गुन्हेगारीवर कडक वचक ठेवण्यासाठी पोलिस प्रशासनाने १७ जुलै २०२५ रोजी रात्रभर “ऑल आऊट कोंबिंग ऑपरेशन” राबवले. या मोहिमेअंतर्गत **वारजे माळवाडी पोलीस ठाण्याच्या गुन्हे शाखेने धडक कारवाई करत, दरोडा टाकण्याच्या तयारीत असलेल्या टोळीतील एक जण ताब्यात घेतला असून, एकूण ₹५,८५,०००/- किमतीचा मुद्देमाल हस्तगत करण्यात आला आहे.
गोपनीय बातमीने फोडला गुन्हेगारीचा कट
रात्रगस्त करणाऱ्या पथकाला पोलीस अंमलदार अमित शेलार यांना त्याच्या खात्रीशीर बातमीदारामार्फत माहिती मिळाली की, म्हाडा कॉलनी, एसआरए बिल्डिंग परिसरात काही इसम बोलेरो गाडीत बसून चोरी वा दरोड्याच्या तयारीत आहेत. मिळालेल्या माहितीच्या आधारे, सहाय्यक पोलीस निरीक्षक सचिन पाटील आणि पोलीस उपनिरीक्षक सिध्देश्वर रायगोंडा यांनी तात्काळ पथकासह घटनास्थळी धाव घेतली.
दरोडेखोरांचा अंधारात पलायन प्रयत्न, एकाला अटक
बोलेरो गाडी (MH 45 A 8458) अंधारात उभी असताना पोलीस स्टाफ तिकडे गेला, तेवढ्यात गाडीत बसलेले पाच अनोळखी इसम अंधाराचा फायदा घेऊन पळण्याचा प्रयत्न करू लागले. मात्र, पोलिसांनी पाठलाग करून त्यातील सोनु कपुरसिंग टाक (वय २९, रा. हडपसर) याला पकडण्यात यश मिळवले.
५.८५ लाख रुपयांचा मुद्देमाल जप्त
अटक करण्यात आलेल्या आरोपीकडून खालीलप्रमाणे मुद्देमाल हस्तगत करण्यात आला:
बोलेरो गाडी – ₹२,५०,०००
चांदीचे दागिने – ₹३,२५,०००
घरफोडीचे साहित्य व प्राणघातक शस्त्र – ₹१०,०००
एकूण किंमत – ₹५,८५,०००/-
गुन्हा दाखल, साथीदारांचा शोध सुरू
या प्रकरणी पोलीस अंमलदार शेलार यांच्या फिर्यादीवरून वारजे माळवाडी पोलीस ठाण्यात गु.र.नं. ३०२/२०२५ नुसार IPC कलम १११, ३१०(४)(५)(६), आर्म्स अॅक्ट ४(२५) आणि महाराष्ट्र पोलीस कायदा कलम ३७(१)(३), १३५ अंतर्गत गुन्हा दाखल करण्यात आला आहे. इतर चार साथीदारांचा शोध पोलिसांकडून सुरू असून, लवकरच त्यांनाही अटक केली जाण्याची शक्यता आहे.
वरिष्ठ अधिकाऱ्यांचे मार्गदर्शन आणि पथकाचे सहकार्य
ही यशस्वी कारवाई मा. अपर पोलीस आयुक्त पश्चिम विभाग श्री. राजेश बनसोडे, मा. पोलीस उपआयुक्त परिमंडळ ३ श्री. संभाजी कदम, मा. सहाय्यक पोलीस आयुक्त कोथरुड विभाग श्री. भाऊसाहेब पटारे यांच्या मार्गदर्शनाखाली पार पडली.
या ऑपरेशनमध्ये पोलिस निरीक्षक प्रकाश धेंडे, निलेश बडाख, सहाय्यक निरीक्षक रणजित मोहिते, सचिन पाटील, उपनिरीक्षक संजय नरळे, सिध्देश्वर रायगोंडा, पोलीस अंमलदार शेलार, तांगडे, जाधव, वाघ, काटे, तळेकर, गुजर, तसेच Cops 24 मार्शलवरील अधिकारी राजु वाकळे, अनिरुद्ध ओव्हाळ, अजय जारे, माधव औताडे आदींनी अतिशय तात्काळ व काटेकोरपणे ही कारवाई केली.
शहरात गुन्हेगारी मोडून काढण्याचा पोलिसांचा निर्धार
पुणे शहरातील गुन्हेगारी नियंत्रित ठेवण्यासाठी पोलिसांनी आता सतत गस्त, गुप्त माहिती, आणि अचानक मोहिमा अशा पद्धतीने गुन्हेगारांना धसका देण्याचे धोरण राबवले आहे. पोलिसांच्या या वेगवान कारवायांमुळे नागरिकांमध्ये दिलासा निर्माण झाला आहे.
