पुणे विमानतळाजवळच्या परिसरातील कार्यक्रमांमध्ये वापरल्या जाणाऱ्या प्रखर बीम लाईट व लेझर बीम लाईटवर ६० दिवसांची बंदी घालण्यात आली आहे. हा निर्णय पुणे शहराचे सह पोलीस आयुक्त आणि विशेष कार्यकारी दंडाधिकारी रंजन कुमार शर्मा यांनी भारतीय नागरिक सुरक्षा संहिता २०२३ चे कलम १६३ नुसार घेतला असून, लोहगाव विमानतळाच्या १५ कि.मी. परिघात तो लागू राहणार आहे.
का झाला निर्णय?
भारतीय वायुसेनेने पुणे पोलिसांना निदर्शनास आणून दिले की, ➡️ लोहगाव परिसरातील कार्यक्रमांमध्ये आकाशात मारल्या जाणाऱ्या प्रखर बीम व लेझर लाईटमुळे ➡️ रात्रीच्या वेळी उड्डाण करणाऱ्या विमानांच्या वैमानिकांच्या डोळ्यांवर प्रकाश पडून दिशाभूल होण्याचा आणि अपघात होण्याचा धोका निर्माण होतो.
त्यानुसार, पोलिसांनी वैमानिकांच्या सुरक्षिततेसाठी तातडीने हा प्रतिबंधक आदेश लागू केला आहे.
काय काय बंदी घालण्यात आली आहे?
🔹 विमानतळाच्या १५ कि.मी. परिसरात कोणतीही व्यक्ती, संस्था किंवा कार्यक्रम आयोजक प्रखर बीम/लेझर लाईटचा वापर करू शकणार नाहीत. 🔹 हा आदेश ९ जुलैपासून पुढील ६० दिवसांपर्यंत लागू राहणार आहे. 🔹 आदेशाचे उल्लंघन करणाऱ्या व्यक्तीवर भारतीय न्याय संहिता कलम २२३ नुसार गुन्हा दाखल करण्यात येईल आणि संबंधितांवर कठोर कारवाई केली जाईल.
अधिकृत सूचना:
हा आदेश पुणे शहराच्या विशेष शाखेतील सुरक्षा/संरक्षण विभागाच्या प्रस्तावावरून आणि भारतीय वायुसेनेच्या निदर्शनानंतर तात्काळ लागू करण्यात आला आहे. या आदेशाबाबतची माहिती स्थानिक वृत्तपत्रांमध्ये प्रसिद्ध करणे अनिवार्य असल्याचे पोलिसांनी स्पष्ट केले आहे.
