पुणे शहराच्या मध्यवर्ती आणि नेहमीच गर्दीने फुललेल्या तुळशीबाग परिसरात भरदिवसा एक धक्कादायक चोरीची घटना घडली आहे. २८ जून २०२५ रोजी दुपारी १२ वाजण्याच्या सुमारास, कावरे कोल्ड्रिंक्स ते राम मंदिर दरम्यान पायी जात असलेल्या एका महिलेची पर्स अज्ञात चोरट्यांनी हिसकावून पळ काढला.
सदर महिलेकडे असलेली पर्स ही जबरदस्तीने हिसकावून नेण्यात आली असून, त्यामध्ये १०,०००/- रुपये रोख रक्कम आणि सोन्याचे दागिने होते. चोरीस गेलेल्या ऐवजाची एकूण किंमत सुमारे ७०,०००/- रुपये इतकी असल्याचे फिर्यादीत नमूद करण्यात आले आहे.
घटनेचे ठिकाण:
बुधवार पेठेतील तुळशीबाग हा परिसर महिलांच्या आणि ग्राहकांच्या नेहमीच्या वर्दळीचा असून, त्या ठिकाणीच चोरट्यांनी आपली संधी साधून गुन्हा केला.
तपास सुरू:
घटनेनंतर पोलीस अंमलदार सुरवसे (मो. 8010750158) यांनी तातडीने घटनास्थळी जाऊन माहिती घेतली आहे. सीसीटीव्ही फुटेज, स्थानिक साक्षीदारांचे जबाब व तांत्रिक तपासाच्या माध्यमातून आरोपींचा माग काढण्याचे काम वेगाने सुरू आहे.
महिलांच्या सुरक्षिततेचा प्रश्न ऐरणीवर:
तुळशीबाग सारख्या वर्दळीच्या भागात भरदिवसा महिलांवर होणाऱ्या अशा प्रकारच्या घटना महिलांच्या सुरक्षिततेबाबत गंभीर प्रश्न निर्माण करत आहेत. पोलिस प्रशासनाने या भागात पेट्रोलिंग वाढवण्याची गरज आहे, अशी मागणी नागरिकांकडून होत आहे.
पोलीसांचे आवाहन:
पुणे पोलिसांनी नागरिकांना आवाहन केले आहे की, आपले मौल्यवान साहित्य गर्दीच्या भागात जपून ठेवावे, सतर्क राहावे, आणि कोणताही संशयास्पद प्रकार दिसल्यास तातडीने पोलिसांशी संपर्क साधावा.
