पुणे शहरातील गुन्हेगारीच्या मुसक्या आवळण्याच्या प्रयत्नांना मोठे यश मिळाले असून महाराष्ट्र संघटित गुन्हेगारी नियंत्रण अधिनियम (MCOCA) अंतर्गत दाखल असलेल्या गंभीर गुन्ह्यातील पाहिजे आरोपी रुपेश राजन केंद्रे (वय १९) याला पुणे पोलिसांच्या गुन्हे शाखा युनिट २ ने एक शिताफीने अटक केली आहे.
या आरोपीविरोधात भा.दं.वि कलम 103, 109, 126(2), 352(3)(5), क्रिमिनल लॉ अमेंडमेंट, आर्म अॅक्ट 4(25) आणि महत्त्वाचे म्हणजे MCOCA कायद्याच्या कलम 3(1)(F), 3(2), 3(4) अंतर्गत गुन्हा दाखल होता.
गोपनीय माहितीवरून कारवाई
पोलिस अंमलदार उज्वल मोकाशी, शंकर कुंभार व विजय पवार यांना गोपनीय बातमी मिळाल्यानंतर त्यांनी वरिष्ठांच्या आदेशानुसार सच्चाई माता मंदिर, आंबेगाव खुर्द परिसरात सापळा रचून आरोपीला पकडले. त्याच्याकडून प्राथमिक चौकशीदरम्यान अनेक गुन्ह्यांमध्ये सहभागाची कबुली मिळाल्याची माहिती मिळते आहे.
कुशल पोलिसी कामगिरी
ही कामगिरी मा. अपर पोलीस आयुक्त (गुन्हे) पंकज देशमुख, मा. पोलीस उप आयुक्त (आर्थिक व सायबर) विवेक मासाळ, सहाय्यक पोलीस आयुक्त (गुन्हे १) गणेश इंगळे यांच्या मार्गदर्शनाखाली पार पडली. वरिष्ठ पोलीस निरीक्षक अंजुम बागवान यांच्या नेतृत्वाखाली सपोनि आशिष कवठेकर, अमोल रसाळ आणि त्यांच्या सहकाऱ्यांनी ही कामगिरी यशस्वी केली.
गुन्हेगारीच्या विरोधात पोलिसांची ठोस भूमिका
पोलिसांच्या या तत्पर आणि व्यूहरचनात्मक कारवाईमुळे संघटित गुन्हेगारी करणाऱ्या टोळ्यांमध्ये भीतीचे वातावरण निर्माण झाले आहे. MCOCA अंतर्गत गुन्हा दाखल असलेल्या आरोपीला अटक केल्यामुळे अन्य फरार आरोपींचा शोध घेण्याचा मार्गही मोकळा झाला आहे.
पोलिस दलाची भूमिका:
“गुन्हेगार कितीही हुशार असला, तरी पोलिसांची योजना अधिक हुशार असते. आम्ही गुन्हेगारीला एक इंचही वाव देणार नाही.” अशी प्रतिक्रिया वरिष्ठ पोलीस अधिकाऱ्यांनी दिली आहे.
सहभागी अधिकारी व कर्मचारी:
सदर ऑपरेशनमध्ये सहभागी असलेले अधिकारी व कर्मचाऱ्यांमध्ये पुढील पोलिसांचा समावेश होता – उज्वल मोकाशी, शंकर कुंभार, विजय पवार, शंकर नेवसे, संजय जाधव, निखिल जाधव, गणेश थोरात, साधना ताम्हाणे, ओमकार कुंभार, संजय आबनावे व विशाल भिलारे.
