वाहतूक पोलिसांचा महत्त्वाचा निर्णय; काम पूर्ण झाल्यानंतर कात्रज चौक पुन्हा सर्व वाहनांसाठी खुला
पुणे – कात्रज चौकात सुरू असलेले सेगमेंटल लाँचिंगचे काम पूर्ण झाल्यामुळे, आता सर्व प्रकारच्या वाहनांसाठी कात्रज चौक पुन्हा खुला करण्यात आला आहे. वाहतूक शाखेचे पोलीस उप आयुक्त डॉ. संदीप भाजीभाकरे यांनी यासंदर्भात अधिकृत प्रेसनोट प्रसिद्ध केली आहे.
दि. २९ नोव्हेंबर २०२४ रोजी, राष्ट्रीय महामार्ग प्राधिकरणाच्या वतीने कात्रज मुख्य चौकात सुरू असलेल्या कामामुळे वाहतुकीत बदल व डायव्हर्जन लागू करण्यात आले होते. या कामामुळे वाहनचालकांना पर्यायी मार्गांचा वापर करावा लागत होता, परिणामी काही भागांत वाहतूक कोंडी देखील जाणवत होती.
मात्र आता काम पूर्ण झाल्याची माहिती राष्ट्रीय महामार्ग विभाग, महापालिका अधिकारी आणि पोलीस यांच्यातील संयुक्त बैठकीनंतर जाहीर करण्यात आली आहे. बैठकीत सर्व अधिकाऱ्यांनी कात्रज चौक पूर्ववत वाहतुकीसाठी खुला करण्याबाबत सहमती दर्शवली. त्यामुळे दि. ६ जून २०२५ रोजी रात्री ११.०० वाजल्यापासून या मार्गावर वाहतुकीस मुभा देण्यात आली आहे.
या निर्णयामुळे कात्रज, कोंढवा, बिबवेवाडी, शिंदे वस्ती, खेड शिवापूर, नवले ब्रिज, पुणे-बंगलोर हायवे आणि येरवडा मार्गावरील वाहनचालकांना मोठा दिलासा मिळणार आहे.
वाहतूक पोलिसांनी संबंधित विभागांना सूचना दिल्या आहेत की, हे निर्णय स्पष्टपणे दर्शविणारे फलक सात दिवसांत बसवून त्याचा अहवाल सादर करावा. तसेच ही माहिती सर्व वर्तमानपत्रांमध्ये प्रसिद्ध व्हावी आणि वाहतूक पोलिसांच्या सोशल मिडिया प्लॅटफॉर्मवरही अपलोड करण्यात यावी, अशी सूचना दिली आहे.
पुणेकर वाहनचालकांसाठी हा एक मोठा दिलासा असून काम पूर्ण झाल्यानंतर आता वाहतूक सुरळीत आणि गतिमान होणार आहे.
